Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me nderime të larta shtetërore, me pjesëmarrje të mijëra ish të burgosurve dhe bashkëvuajtëseve nëpër burgje, me pjesëmarrje masive të liridashësve nga Kosova dhe mbarë trojet, sot në Kompleksin e varrezave të dëshmorëve, në lagjen Velania, në Prishtinë, u varros trupi i Bacë, Adem Demaçit, i cili gjatë tërë jetës ishte flamurtari për çlirim dhe bashkim kombëtar. Në ceremoninë e varrimit të tij morën pjesë autoritetet më të larta të vendit, bashkëveprimtarët dhe bashkëmendimtarët dhe mijëra qytetarë nga mbarë trojet. Duke folur për jetën dhe veprën heroike të bacë Adem Demaçit, bashkëveprimtari i tij, Selatin Novosella theksoi se “dhembja jonë sot bacë, ka emrin e Kosovës për lirinë e së cilës flijove rininë, shëndetin, familjen, dhuntinë tënde krijuese. Dhembja e pakufi ka emrin e nënës, e cila të porositi të mos kujdesesh për të, por për nënë Shqipëri. Dhembja jonë bacë sot mban emrin e atdheut tënd, Shqipërisë, të cilën e quaje nëna Shqipëri. Baci jonë i mirë, ti më përpara zgjodhe lirinë në burg se sa burgun në liri të rrejshme. Baca Adem sot kur po ndahemi prej teje vetëm na ngushëllon një moment se patëm fatin të jetojmë në epokën tënde, tha në mes tjerash ish i burgosuri politik, Selatin Novosella, në fjalën e tij në ceremoninë e varrimit të Bacë Adem Demaçit.
