Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Prej tre javësh, ekipet e ekspertëve të Institutit të Mjekësisë Ligjore, po zhvillojnë gërmime në lokacionin Kozhle, në rrethinën e Novi Pazarit, ku dyshohet se ndodhen mbetje mortore të shqiptarëve të vrarë gjatë luftës në Kosovë. Sipas IML-së, hetimet po bazohen në dëshmitë e personave që pretendojnë se në këtë vend janë fshehur trupat e viktimave të luftës. “Deri më sot, në territorin e Serbisë janë lokalizuar pesë varreza masive, prej ku janë zhvarrosur mbetjet mortore të 950 shqiptarëve të vrarë gjatë luftës”, thuhet në njoftim. Instituti ka bërë të ditur se puna në këtë drejtim nuk do të ndalet deri në zbulimin e fatit të çdo personi të zhdukur me forcë gjatë luftës së fundit në Kosovë. Procesi i gërmimeve dhe hetimeve po zhvillohet në bashkëpunim me ekspertët e EULEX-it dhe organizatat e tjera që mbështesin këtë mision, të cilat përmes mandatit ligjor angazhohen për zbardhjen e plotë të krimeve dhe kthimin e dinjitetshëm të viktimave te familjet e tyre. Ky operacion është pjesë e përpjekjeve të vazhdueshme për zbardhjen e fatit të mijëra personave të zhdukur, çështje që mbetet ende një nga plagët më të dhimbshme të pasluftës në Kosovë.
