Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ramush Haradinaj, lider i Aleancës për Ardhmërinë e Kosovës (AAK), prej më shumë se 25 vitesh mbetet një nga figurat më të qëndrueshme dhe të konsoliduara të politikës kosovare. I formuar nga përvoja e luftës dhe nga sakrifica familjare – duke qenë ndër të paktët komandantë të zonave operative të UÇK-së me familjarë të rënë për liri – Haradinaj ka ndërtuar një profil politik që mbështetet në përkushtimin e vazhdueshëm ndaj shtetësisë së Kosovës.
Si kryetar i AAK-së, ai ka ruajtur një kurs të qartë pro-perëndimor dhe një vijë politike që thekson marrëdhëniet strategjike me SHBA-në dhe BE-në. Qëndrimet e tij janë të lidhura fort me idenë se Kosova duhet të jetë e parashikueshme, e besueshme dhe e koordinuar me aleatët ndërkombëtarë.
Kritikat ndaj Qeverisë Kurti – nga kundërshtimet e hershme te realiteti i sotëm
Në vite, Haradinaj ka qenë ndër kritikët më të qëndrueshëm të politikave të kryeministrit Albin Kurti, sidomos në fushat e dialogut, politikës së jashtme, ekonomisë dhe sigurisë. Në fillim, një pjesë e opinionit publik dhe e klasës politike i shihte paralajmërimet e tij si të tepruara ose të nxitura nga rivaliteti politik. Shpesh ai u kritikua se po e dramatizonte situatën ose se po reagonte me tone të forta.
Megjithatë, me kalimin e kohës, disa zhvillime konkrete kanë bërë që një pjesë e këtyre kritikëve të fillojnë të rishikojnë qëndrimet e tyre. Tensionet me aleatët ndërkombëtarë, ngecjet në proceset integruese, sfidat në dialog dhe vështirësitë në disa sektorë të brendshëm janë interpretuar nga analistë dhe opinionistë si shenja se një pjesë e paralajmërimeve të Haradinajt po gjejnë reflektim në realitetin politik e institucional të vendit.
Në këtë kontekst, Haradinaj shihet si një politikan që ka këmbëngulur në rrezikun e izolimit dhe në nevojën për më shumë koordinim me partnerët e jashtëm – qasje që sot po diskutohet më gjerësisht edhe nga ata që dikur e kundërshtonin.
Një lider që lidh luftën me shtetndërtimin
Pozicioni i Haradinajt në politikë nuk buron vetëm nga funksionet që ka mbajtur, por edhe nga historia e tij personale. Ai është një nga figurat e pakta që përfaqëson vazhdimësinë midis brezit të luftës dhe brezit të shtetndërtuesve. Ky kombinim e bën figurën e tij të qëndrueshme dhe të lexueshme politikisht, si nga mbështetësit, ashtu edhe nga kundërshtarët.
Në një klimë politike që shpesh dominohet nga retorika e momentit, Haradinaj mbetet një zë konstant, i fokusuar në çështje të sovranitetit, sigurisë dhe marrëdhënieve strategjike të Kosovës. Roli i tij si lider i AAK-së dhe si figurë me përvojë të drejtpërdrejtë në mbrojtjen e vendit dhe përkushtimi i tij për interesat shtetërore e ka konsoliduar rolin e tij si një nga figurat më të rëndësishme dhe më të domosdoshme në politikën kosovare.
(autor është anëtar dhe ish kryetar i Lidhjes së Historianëve të Kosovës “Ali Hadri” dega në Deçan)
