Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Bashkimi Evropian ka sugjeruar që autoritetet e Kosovës të kërkojnë bashkëpunim ndërkombëtar për hetimin e tentimvrasjes dhe rrëmbimit të Milan Vukashinoviqit, i cili u plagos dhe u rrëmbye më 1 nëntor në Jellakcë të Leposaviqit. Prokuroria në Mitrovicë ka dërguar për ekzaminim dy telefonat e tij, ndërsa institucionet serbe nuk kanë ofruar asnjë përgjigje lidhur me rastin. Zëdhënësi i Zyrës së BE-së në Prishtinë, Nikola Gaon, ka theksuar se autoritetet mund të përdorin mekanizmin e Ndihmës së Ndërsjellë Juridike që lehtësohet nga BE-ja. Ndërkohë, EULEX ka shprehur gatishmërinë të ndërmjetësojë në shkëmbimin e informatave mes Policisë së Kosovës, Interpolit, Europolit dhe Ministrisë së Brendshme të Serbisë, nëse kërkohet nga institucionet kosovare. Prokuroria Themelore në Mitrovicë ka njoftuar se janë intervistuar disa të afërm të viktimës dhe janë gjetur dy telefona të Vukashinoviqit, ndërsa nuk është bërë ende e qartë nëse është parashtruar ndonjë kërkesë për bashkëpunim ndërkombëtar. Autoritetet serbe, përfshirë edhe Klinikën në Nish ku po trajtohet Vukashinoviq, nuk kanë dhënë informacion për situatën e tij dhe nuk kanë lejuar vizita familjare. Avokati i familjes, Ivan Niniq, ka kritikuar institucionin e Mbrojtësit të Qytetarëve në Serbi për mungesë veprimi, duke theksuar se ky institucion ka detyrim zyrtar për të ndërhyrë në raste të tilla.
