Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori i Mbretërisë së Bashkuar në Kosovë, Jonathan Hargreaves, ka paralajmëruar se procesi i rinumërimit të votave, ndonëse i domosdoshëm për integritetin zgjedhor, mund të bartë rreziqe serioze sa i përket respektimit të afateve kushtetuese, veçanërisht për zgjedhjen e presidentit të ri. Hargreaves theksoi se rinumërimi është dëshmi e aftësisë së sistemit zgjedhor për të identifikuar dhe adresuar dobësitë, por njëkohësisht kërkoi që Komisioni Qendror i Zgjedhjeve ta përmbyllë këtë proces sa më shpejt që të jetë e mundur. “Kjo natyrisht bart disa rreziqe sa i përket afateve kohore dhe shpresoj që Komisioni ta kryejë rinumërimin sa më shpejt që të jetë e mundur”, tha ai. Ambasadori britanik nënvizoi se pas përfundimit të rinumërimit është jetike që partitë politike të bashkohen për të mundësuar konstituimin e Kuvendit dhe formimin e qeverisë, në mënyrë që vendi të mos hyjë në një bllokadë të zgjatur institucionale. Sipas tij, miratimi i buxhetit dhe marrëveshjeve ndërkombëtare nuk duhet të vonohet, pasi këto janë procese thelbësore për funksionimin normal të shtetit. Hargreaves veçoi në mënyrë të posaçme rëndësinë e respektimit të afateve për zgjedhjen e presidentit të ri, duke theksuar se ky proces duhet të zhvillohet pa vonesa dhe në përputhje me Kushtetutën. “Jam i bindur se të gjitha partitë janë të përkushtuara për këtë, sepse të gjithë e kuptojnë rëndësinë që këto procese tejet të rëndësishme kanë për Kosovën”, deklaroi ai.
