Ymeri paditë Konjufcën për shpifje, “për më pak se një vit jam në tri beteja ligjore me pushtetin”

Ymeri bëri të ditur se, përmes avokatit Donat Lushaku, ka kërkuar që Konjufca të kërkojë falje publike për deklaratat që i konsideron shpifëse. Në të kundërtën, ajo kërkon kompensim financiar, i cili, sipas saj, do t’i dhurohet shoqatës Down Syndrome Kosova.

Ajo theksoi se kjo është beteja e tretë ligjore që zhvillon ndaj institucioneve ose përfaqësuesve të pushtetit brenda më pak se një viti, pas kallëzimit në Prokurorinë Speciale për çështjen e çmimit të energjisë dhe padisë për shpifje të ngritur ndaj saj nga KEK-u.

“1 njeri kundrejt 1 aparati të tërë shtetëror me 3 beteja ligjore”, shkroi Ymeri në reagimin e saj publik.