Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri në detyrë i Kosovës, Albin Kurti, ka dalë para mediave pas ndërprerjes së seancës konstituive të Kuvendit, e cila u pezullua pasi ai kërkoi kohë shtesë lidhur me hapat e mëtejmë institucionalë, përfshirë procesin e zgjedhjes së Presidentit. Kurti tha se mbetet i gatshëm për bashkëpunim politik dhe kërkoi nga partitë opozitare që të angazhohen në dialog për të gjetur një zgjidhje për çështjet e hapura institucionale. Ai u bëri thirrje kryetarit të AAK-së, Ardian Gjini, dhe kryetarit të PDK-së, Bedri Hamza, që të zhvillojnë takime për të diskutuar përgjegjësitë që lidhen me formimin e institucioneve të reja. “Duhet diskutim dhe komunikim, dhe unë jam i vullnetshëm dhe i interesuar”, deklaroi Kurti, duke theksuar se zgjedhja e Presidentit është përgjegjësi e të gjitha subjekteve politike. Ai tha se, nëse kryetari i Kuvendit i takon subjektit fitues dhe qeveria formohet nga mazhoranca, atëherë edhe opozita ka rol në procesin e zgjedhjes së Presidentit. Ndërkohë, ftesat e fundit të Kurtit për takime me PDK-në dhe AAK-në vijnë pas një periudhe kur këto dy subjekte nuk ishin konsideruar nga ai si partnerë për bashkëpunim politik. Të dy partitë opozitare më herët kanë refuzuar ftesat për takim.
