Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Avokati i Hashim Thaçit, Pierre-Richard Prosper, ka kritikuar ashpër aktgjykimin e Dhomave të Specializuara në Hagë, duke thënë se pasojat e tij, sipas tij, shkojnë përtej katër të dënuarve dhe prekin vetë narrativën e luftës çlirimtare të Kosovës dhe aleancën e saj me Perëndimin. Prosper u ndal veçanërisht te cilësimi i UÇK-së si “Ndërmarrje e Përbashkët Kriminale”, duke argumentuar se një përfundim i tillë, sipas tij, krijon një paradoks edhe për rolin e NATO-s në luftën e Kosovës. “Tre burra kanë rishkruar dhe kanë shlyer historinë”, deklaroi Prosper, duke kundërshtuar përfundimin e trupit gjykues se Hashim Thaçi dhe të akuzuarit e tjerë ishin në krye të një strukture që lidhej me abuzimet e përmendura në aktgjykim. Avokati amerikan tha se vendimi, sipas tij, nuk e kufizoi përgjegjësinë te individë apo fraksione të caktuara, por e shtriu atë në tërësinë e UÇK-së, duke pretenduar se kjo e njollos edhe trashëgiminë e çlirimit dhe pavarësisë së Kosovës. Prosper kritikoi edhe përmendjen në aktgjykim të komandantëve të tjerë të UÇK-së që nuk kanë qenë pjesë e procesit gjyqësor, si dhe mungesën e transparencës rreth aktgjykimit prej më shumë se 2 mijë faqesh. Ai konfirmoi se do të vazhdojë ta mbrojë Thaçin në procesin e apelit, duke deklaruar se synimi i mbrojtjes është pastrimi i plotë i emrit të tij. Sipas Prosperit, procedura e apelit pritet të zgjasë rreth një vit, ndërsa aktgjykimin aktual ai e cilësoi si të padrejtë dhe moralisht të korruptuar.
