Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas aktgjykimit të 16 shtatorit ndaj katër ish-krerëve të UÇK-së, përplasja politike në Kosovë është përqendruar edhe në ndryshimin e Ligjit për Dhomat e Specializuara. PDK-ja kërkon që projektligji i saj të procedohet sa më shpejt në Kuvend, ndërsa LVV-ja kërkon që fillimisht të zgjidhet Presidenti i Republikës.
Shefi i Grupit Parlamentar të PDK-së, Arian Tahiri, ka kërkuar që Qeveria të mos e zvarrisë dhënien e mendimit për projektligjin që synon ndryshimin e Ligjit për Dhomat e Specializuara, duke theksuar se kjo çështje nuk duhet të lidhet me kalkulimet për zgjedhjen e Presidentit.
Në anën tjetër, deputeti i LVV-së, Adnan Rrustemi, ka thënë se të dyja çështjet tashmë janë të ndërlidhura, duke argumentuar se para se të hapet një betejë e re politike për Specialen duhet të zgjidhet çështja e Presidentit.
Afati për zgjedhjen e Presidentit, sipas aktgjykimit të Gjykatës Kushtetuese, përfundon më 6 tetor 2026. Nëse Presidenti nuk zgjidhet deri atëherë, Kuvendi shpërndahet dhe vendi shkon në zgjedhje të reja.
PDK-ja këmbëngul se kjo nuk duhet të pengojë procedimin e projektligjit për Specialen, ndërsa nga LVV-ja theksohet se fillimisht duhet të arrihet një marrëveshje për Presidentin, në mënyrë që çështja e Speciales të trajtohet më pas pa rrezikun e shpërndarjes së Kuvendit.
Kështu, ditët e mbetura deri më 6 tetor e vendosin përballë dy çështjeve: kërkesës së PDK-së për procedim të shpejtë të ndryshimeve të Ligjit për Specialen dhe prioritizimit të zgjedhjes së Presidentit nga LVV-ja.
