Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Thuhet se kur plaçkitësit njëherë i kishin hyrë në shtëpi, Nasradinit, ai duke mos guxuar të tregonte se ishte i zoti i shtëpisë dhe duke parë se ata nuk po i linin asgjë, kishte marrë jorganin e vet dhe ishte përzier me hajnat, të cilët ishin shpërndarë me shpejtësi. Një fqinj e kishte parë Nasradinin me jorgan në shpinë dhe i habitur e kishte pyetur:
– Mor Nasradin, nga larg pashë që hajnat ta plaçkitën shtëpinë por, edhe ti vodhe jorganin tënd, mos je edhe ti nga ata, kishte pyetur ai?
– Hajnat morën çka gjeten e unë, në pamundësi për t’ i penguar dhe duke parë se nuk po më mbetej asgjë u kujtova dhe mora jorganin tim, sepse në çast më shkoi mendja si ta kaloj natën në shtëpinë e plaçkitur e të ftohtë?
Fushata zgjedhore në Shqipëri ka përfunduar, dhe të gjitha partitë po ngarendin para kohe për në “Maratonë”, po bëjnë garë për ta paralajmëruar fitoren e vet, në zgjedhjet parlamentare të 25 qershorit 2017, ku po garojnë politikanët shqiptarë për ta marrë secili hisen e vet në qeverisjen e ardhshme të Shqipërisë së katandisur. “Tepsia” është e madhe dhe secili do të kërkojë “hisen”, jo për ta zhvilluar vendin por për ta zhvatur e plaçkitur, aq sa mundet dhe duke u fshehur prapa zotimeve e premtimeve po thuajse boshe, të kallajisura me shprehje patriotike, demokratike po gjithnjë hipokrite e mashtruese.
Nëse i krahasojmë këto vitet e qeverisjes së Edi Ramës me qeverisjet paraprake dallimi është shumë i madh. Mirëpo sa do që është bërë dhe ajo shihet, nuk ka pasur mundësi të bëhet më shumë, sepse qeveritarët paraprakë kanë lënë pas një kaos në të gjitha segmentet e qeverisjes.
Në kohën kur Rama mori timonin e Qeverisë, vendi ishte zhytur në kaos, papunësi, urrejtje ndaj Shtetit dhe ligjit, korrupsion, trafiqe, hajni, drogë, administratë partiake, medie klienteliste partiake, polici partiake, shëndetësi e arsim partiak, publik e privat. Në një gjendje të tillë, kryeqeveritari, Edi Rama me tërë forcën që dispononte kishte filluar ta sulmonte korrupsionin, por ai ishte trashur aq shumë sa nuk bëhej më lufta e Davidit kundër Golijatit. Rama mundohej ta gjente armën e Davidit, por Goliati i tij kishte lëshuar shtat dhe nuk trandej nga të goditurat.
E filloi mirë e mbarë në Llazarat, por hapi kutinë e pandorës, sepse llazaratasit e Berishës e të Metës ishin shpërndarë në tërë Shqipërinë në jug e në veri. Droga kishte uzurpuar deri edhe segmente më vitale të shtetit. Pak më vonë u kuptua se Edi Rami kishte goditur gjarprin e drogës në bisht dhe jo në kokë, sepse koka ishte aq e madhe, sa nuk goditej pa shpalljen e gjendjes së jashtëzakonshme dhe pa bërë një reformë rrënjësore, të cilën nuk do ta lejonte në asnjë mënyrë as Brukseli zyrtar, për arsye që dihen por nuk thuhen.
Pavarësisht urrejtjes apo përkrahjes që shqiptarët kanë për Ramën, nëse flasin drejt dhe me gjuhën e fakteve, Rama ka bërë më shumë se të gjithë qeveritarët paraprakë, por tri katër vjet ndërtim në krahasim ne 24 vjet rrënim nuk japin rezultat tjetër. Të ndërtohet është shumë vështirë, meqë duhet mund e djersë, ndërsa rrënimi është shumë i thjeshtë. Këtë e kemi parë me rastin e turrit të çmendur të shumë shqiptarëve kundër institucioneve dhe kundër tërë asaj që ishte ndërtuar me mund djersa dhe sakrifica të një populli të tërë për 45 vjet, në kohën e socializmit.
Të arriturat e Edi Ramës dhe kabinetit të tij qeveritar nuk mund të mohohen me gjuhën e fakteve, por mund të deformohen me gjuhën e hipokrizisë e djallëzisë sikur bëjnë të vetëquajturit analistë, në Shqipëri, të cilët mundohen të shpërfytyrojnë gjithçka të mirë dhe me vlerë që është arritur në vend. Po kjo është vetëm njëra ana e ligë e realitetit virtual, sepse një pjesë e njerëzve tanë bjerrakohës kohën e tyre më të mirë e shpenzojnë duke shikuar debate koti, të stërholluara gjoja me mençuri por të manifestuara me një gjuhë arrogante, rrugaçe, një gjuhë që është shumë larg emancipimit njerëzor e kombëtar. Personalisht nuk besoj se elektorati në Shqipëri mund të bjerë pre ta zëmë dhjetë analistëve të shitur e të blerë, të prostituuar nga të gjitha mediet, kameleonë tipikë të idiolatrisë e profanisë makute.
Edi Rama është intelektual me kredibilitet dhe dinjitet. Ka dije e mençuri, të nivelit të intelektualit botëror dhe mban kontakt me mendimin bashkëkohor, shoqëror, filozofik e politik, ka sens për të goditur të keqen dhe për ta demaskuar atë, ka guxim ta thotë të vërtetën edhe kur ajo i kthehet bumerang, kështu i ka ndodhur jo vetëm njëherë me kritikat parimore drejtuar BE-së, lidhur me çështjen e shqiptare të përgjegjësi. Ai na ka bindur se mund të qeveriset mirë nëse ka vullnet, dije, përkushtim dhe sakrificë. Kryeministri i Shqipërisë dhe kryetari i Partisë Socialiste, Edi Rama, nuk mund të gjejë shumë si vetë dhe kjo është fatkeqësia e tij dhe jona, sepse nuk bëhesh dot trim i mirë pa shumë shokë. Mund të bëhesh Ali baba po i pate dhjetë hajdutë shqiptarë, nuk ka nevojë të jenë 40 dhe me të tillët mund ta përmbysësh Shqipërinë kur të duash. Ky perceptim i demokracisë shqiptare jo vetëm të brishtë për edhe të deformuar është perceptimi i një pjese të shqiptarëve me origjinë lindore, bizantine, shqiptarë të tipit: “haja qenit pija qenit, tash i bimë karadyzenit”. Për fatin tonë të keq kjo mendësi, ky bizantino-aziatizëm ia ka zënë frymën politikës shqiptare, sepse është ADN-ja e tillë dhe kjo flet shumë. Në spotin e tij propagandues, Lulzim Basha krenohet se ka qenë zyrtar i UNMIK-ut në hulumtimin e krimeve të luftës në Kosovë, por nuk precizon se kishte hulumtuar krimet serbe, apo ato krime të pretenduara të Beogradit zyrtar me peruanin, Hoze Baryber, me të cilin kishte shpikur “Kullën e verdhë”, ku gjoja UÇK-ja kishte bërë transplantin e organeve të serbëve.
Zgjedhësit në Shqipëri kanë shans të zgjedhin, në mesin e tre emrave që përfaqësojnë tri partitë kryesore politike. Të besojmë dhe të shpresojmë se kësaj radhe do të zgjedhin më meritorët, sepse dihet mirë e kaluara dhe biografia e të treve. Rama në këtë mes shkëlqen me dije, guxim, vendosmëri dhe patriotizëm. Ai ka dhënë shembuj konkretë se Shqipëria mund të qeveriset si duhet.
Ahmet Qeriqi
