Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Opinionisti Agim Sopi ka vënë në pikëpyetje mundësinë që Kosova të kërkojë përmes kanaleve zyrtare nga Turqia arrestimin dhe ekstradimin e biznesmenit serb nga veriu i Kosovës, Zvonko Veselinoviq, pas raportimeve se ai është larguar drejt këtij shteti. Sopi ka theksuar se mungesa e anëtarësimit të Kosovës në Interpol paraqet pengesë në përdorimin e mekanizmave të zakonshëm ndërkombëtarë për këtë çështje. Ai gjithashtu ka shprehur dyshime nëse Ankaraja do të ishte e gatshme të vepronte në bazë të një kërkese të Prishtinës, pavarësisht marrëdhënieve mes dy vendeve. “Meqë nuk jemi pjesë e Interpolit, nëpërmjet kanaleve zyrtare Kosova s’mundet ta kërkojë ekstradimin. Janë raporte miqësore, të relaksuara, por nuk e di sa janë të besueshme në atë masë që Qeveria jonë të kërkojë nga Erdogani ta arrestojë atë dhe ta dorëzojë në Kosovë. Nuk jam fort i sigurt që Turqia është e gatshme ta bëjë një gjë të tillë, pavarësisht raporteve”, ka deklaruar Sopi. Ndërkohë, mediat në Serbi kanë raportuar se Veselinoviq është larguar drejt Turqisë, ndërsa burime të Radios Evropa e Lirë kanë bërë të ditur se ai ka udhëtuar atje përmes Bosnjës. Çështja e raportuar e udhëtimit të Veselinoviqit drejt Turqisë rikthen në vëmendje sfidat e bashkëpunimit juridik ndërkombëtar dhe mundësitë e institucioneve të Kosovës për të siguruar përballjen me drejtësinë të personave të kërkuar nga autoritetet vendore.
