Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Tani kur ka kaluar një vit e gjysmë qeverisje, kryeministri Albin Kurti ndodhet në një situatë pa rrugëdalje, në një gjendje së cilës i ka kontribuar vetë me të vetët, por e cila është edhe pasojë e mungesës së stabilitetit politik të vendit, pasi kemi “dreqin kojshi” dhe nuk bëjmë dot ashtu si duam dhe ashtu sikur do të duhej të bënim, të gjithë tok.
Qeveria Kurti ndodhet në një situatë pa rrugëdalje, pasi nga keqqeverisja, nga lufta që u ka shpallur të gjithëve, duke i thirrur në numrin 51 e duke injoruar 49-shin, duke bërë përpjekje të realizojë të paktën ndonjërin nga premtimet, sidomos ato në dialog me Serbinë, i gjendur edhe në rrethana të pavolitshme ekonomike për shkak të pandemisë, por edhe për shkak të pasojave të luftës në Ukrainë, që sollën krizën ekonomike dhe energjetike, Qeveria Kurti, nuk do të mund t’ ia dalë, jo sidomos duke injoruar dhe duke lënë jashtë, dhe duke stigmatizuar 49 përqindëshin e popullatës e cila nuk e ka votuar as i beson.
Situata në Veri është një “krizë e ngrirë”, prej pas mbarimit të luftës në Kosovë, në qershor të vitit 1999 dhe sa herë që forcat politike apo institucionet e vendit kanë provuar “ta shkrijnë” janë lagur keq e më keq, sepse në veriun e vendit, prej 16 qershorit të vitit 1999 kur kanë zbarkuar forcat franceze të NATO-KFOR-it, nuk ka pasur administrim nga Kosova.
Veriu i Kosovës, më saktësisht katër komunat me shumicë serbe, janë “Vilajeti i errët i Serbisë”, të cilin e ka lejuar të funksionojë si të tillë administrata ndërkombëtare në Kosovë, fillimisht KFOR-i, pastaj UNMIK-u e më vonë EULEXI. Të tri këto formacione të sigurisë janë të pranishme në Veri dhe do të jenë krejt derisa të definohet qartë statusi politik i kësaj pjese të Kosovës, me shumicë serbe.
Sa herë kanë prekur në veri përfaqësuesit e institucioneve të Kosovës janë kthyer me humbje dhe kanë filluar ta akuzojnë për dështim, jo Serbinë, por njëri tjetrin.
Veriu i Kosovës për 24 vjet ka ndërtuar një identitet të ri politik, ka gëzuar dhe gëzon një autonomi të plotë administrative, ka pastruar gati në tërësi popullatën shqiptare, ka grumbulluar serbët e ikur nga Kosova dhe ka krijuar një shtet të pashpallur brenda Kosovës, dhe, nga viti në vit është lidhur fuqishëm me Beogradin zyrtar.
Ky është realiteti që nuk iu pëlqen krerëve të Kosovës, realiteti të cilin nuk e pranojnë, zotohen se kurrë nuk do ta pranojnë, por ai ekziston, funksionon, ka mbështetje si nga Beogradi ashtu edhe nga Brukseli, pse jo edhe nga të gjithë të tjerët.
Andaj përpjekja e Albin Kurtit për ta kthyer qeverisjen në Veri të cilën nuk e ka pasur askush deri tani, është përpjekje e kotë, sepse prej Urës së Ibrit e tutje nuk është vetëm Beogradi, por në radhë të parë është e pranishme Moska, sidomos tani në këtë kohë përditë e më të pasigurt.
Kryeministri, Albin Kurti, pas takimit me përfaqësuesit ndërkombëtarë, Miroslav Lajçak dhe Gabriel Escobar në Prishtinë, ka thënë se vendimet, të cilat i ka marrë Qeveria e Kosovës për targat dhe dokumentet për hyrje-dalje do të fillojnë zbatimin nga 1 shtatori dhe se s’do të ketë më shtyrje. Në një intervistë për Al-Xhazira Kurti ka sqaruar se është takuar me gjeneralin e KFOR-it, Ferenc Kajari, po ashtu edhe me policinë dhe EULEX-in. Barrikadat nuk janë zgjidhje. Ka një mekanizëm shtetëror që do të reagojë, nuk është vetëm policia, por edhe forcat speciale të policisë dhe askush nuk mund ta ndalojë policinë speciale që të vijë në veri. Veriu i Kosovës është pjesë e Kosovës, ndodhet në Kosovë dhe nuk ka pasur kurrë më shumë sundim të ligjit në veri të Kosovës sesa tani”, tha Kurti.
Këto deklarata të forta të Kurtit, janë krejt të pamatura, por Kurti tashmë ka mësuar se deklarata politike vlen për një moment, derisa të publikohet ajo e radhës. Se ku mbështet Albin Kurti kur bën këso deklarata ai e di vetë, por realiteti në terren është krejt tjetërfare.
Albin Kurti dhe stafi i tij tani e tutje do të ballafaqohen edhe me probleme, të cilat do ta rrënojnë nga brenda, edhe pse do të bëjë përpjekje për t’i shpërqendruar, duke u thirrur me rrezikun e luftës nga Serbia.
Grevat sindikale që aktualisht kanë filluar, rritja e pakënaqësisë sociale, inflacioni, rritja enorme e çmimeve pa kontroll, kriza energjetike me reduktime maksimale kur tani jemi në verë, thellimi përditë e më tej i krizave, janë realiteti me të cilin do të merret Qeveria Kurti, e cila në vend të dialogut dhe marrëveshjes ka filluar kërcënimet e arrogancën, krejt kjo tregon se Qeveria tashmë e ka humbur davanë dhe ndodhet para kolapsit.
Kurti dhe askush në Qeverinë e tij, nuk duket se ka një plan real të daljes nga kriza, sepse është vetë Qeveria që ka prodhuar krizën, është vetë Qeveria e cila nxjerrë në sipërfaqe probleme me të cilat nuk ka fuqi të ballafaqohet, është Qeveria që sundon me arrogancë, me mungesë mirëkuptimi, duke injoruar popullatën që nuk e ka votuar, duke rrahur gjoks për qeverisje të mirë, për luftë kundër korrupsionet me zyrtarë të vetë të korruptuar deri në fyt.
Kurti dhe kabineti i tij qeveritar nuk do ta ketë të gjatë, edhe pse opozita në Kosovë nuk është unike dhe nuk mund të ballafaqohet me ndërrimin e pushtetit, pasi nuk ka as synime, as siguri në vetvete. Në një situatë të tillë kriza dhe kaosi do të thellohen, përçarjet dhe lufta e brendshme do t i shkojnë për shtati Serbisë dhe ne do të vendnumërojmë si gjithnjë, duke akuzuar e duke fajësuar njëri tjetrin.
Ahmet Qeriqi
Krojmir
26.8.2022
