Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Altin Krasniqi, djali i ish-kryetarit të Kuvendit, Jakup Krasniqi, ka kritikuar institucionet e Kosovës për mungesën e, siç tha ai, mbështetjes politike dhe diplomatike ndaj ish-krerëve të UÇK-së që po gjykohen në Hagë. Krasniqi tha se institucionet e Kosovës, përveç mbështetjes financiare për mbrojtjen ligjore, nuk kanë ndërmarrë hapa të tjerë në lidhje me procesin gjyqësor. Sipas tij, familjarët nuk kanë kërkuar ndërhyrje në drejtësi, por që procesi të trajtohet mbi bazën e fakteve dhe të drejtave themelore. Krasniqi kritikoi edhe faktin që kryeministri në detyrë, Albin Kurti, nuk i ka vizituar ish-krerët e UÇK-së në Hagë. Ai tha se, pavarësisht dallimeve politike, institucionet duhet të tregojnë mbështetje ndaj tyre. “Ata nuk janë duke u gjykuar si individë. Janë duke u gjykuar si krerët e UÇK-së”, tha Krasniqi. Ai shtoi se UÇK-ja nuk duhet të shihet përmes përkatësive politike, duke theksuar se, sipas tij, ajo përfaqëson sakrificën e popullit të Kosovës për çlirim. Vendimi ndaj Hashim Thaçit, Kadri Veselit, Jakup Krasniqit dhe Rexhep Selimit pritet të shpallet më 16 shtator në Dhomat e Specializuara në Hagë.
