Vetëvendosje

Fatmir Grajqevci: Roli i faktorëve psikologjikë në fitoren e Vetëvendosjes

Janë të shumtë faktorët që ndikojnë te elektorati për ta votuar atë apo këtë subjekt politik, por si duket, faktor vendimtar që ka ndikuar te masat e gjera për ta votuar partinë Vetëvendosje, është faktori psikologjik. Nuk është ky ndikim i rastësishëm por i përdorur me mjaftë mjeshtëri e djallëzi nga shefi i Vetëvendosjes, Albin Kurti dhe ithtarët e tij besnik, sidomos ata nga safi i parë.

   Askush nuk e mohon se një ndihmë të madhe për t’ua plotësuar etjen e madhe për pushtet, Albin Kurtit dhe bashkë partiakëve të tij, kanë dhënë edhe partitë tjera, me keq qeverisjen e tyre, herë pa dashje e herë me dashje por se faktor vendimtar ka qenë faktori psikologjik. Kreu i partisë Vetëvendosje, ia ka dal që elektoratit, t’ ia afrojë  ndjenjën se veprimi më atdhetar është votimi dhe përkrahja e Partisë Vetëvendosje, apo sikur e quajnë ende “Lëvizje” ani pse ka vite që e ka humbur atributin e të quajturit “Lëvizje”, nëse e ka pasur ndonjëherë me të vërtetë këtë atribut! Karakteristikë qenësore e “Lëvizjeve” është sjellja e ndryshimeve në shoqëri, ose luftimi i dukurive negative apo edhe bërjen e kthesave politike e shoqërore por pa e pasur si synim primar dhe të fundit marrjen e pushtetit. E partia Vetëvendosje, duke u kamufluar me atributin e konceptit “Lëvizje” ia ka dal që etjen e saj për pushtet, ta kamuflojë me idealet më të larta, bashkimi kombëtar, atdhetarizmi, nacionalizmi, ky i fundit në kuptimin pozitiv të fjalës. Të zhgënjyer me të drejtë dhe arsye, në partitë tjera, një pjesë e elektoratit, ndjenjën e ndëshkimit ndaj partive paraprake në pushtet, e kanë përjetuar duke votuar Vetëvendosjen. Por nuk ka qenë kjo ndjesia e ndëshkimit që i ka motivuar zgjedhësit sa ka qenë emocioni tjetër, ai i të ndjerit çlirimtar i atdheut dhe shpëtimtar i tij! Këto dy ndjesi ua ka dhënë Vetëvendosje të gjithë atyre që e kanë votuar këtë parti. Duhet pasur parasysh se derisa gjatë viteve të robërisë e luftës çlirimtare, për t’u perceptuar si atdhetar, duhej të ndërmerrje veprime që kushtonin me burg ose me jetë, partia Vetëvendosje ia doli që këtë ndjesi të ua ofroj me një çmim dukshëm më të vogël – në këmbim të votës!

   Së pari, shefi i Vetëvendosjes, Albin Kurti dhe bashkë partiakët e stafit të parë, ndërtuan konceptin  se Kosova po degradon çdo ditë, se vendi është i pushtuar ( ! ) nga partitë tjera dhe se tani duhej një mobilizim i madh për ta çliruar  ( ! ) atdheun dhe shpëtuar ( ! ) atë nga shkatërrimi që i është bërë për 20 vite me radhë. Duke i besuar kësaj propagande djallëzore, votues të shumtë, të etur po ashtu nga dëshira për ta ndjerë veten si luftëtar të flaktë për komb e vatan, ia mësyn Kosovës. Ama jo si ata atdhetarët e njëmendtë, të dy dekadave më parë, që të ngarkuar me armë, në këmbë ia mësynin Kosovës, bjeshkëve e shkrepave, në dimër e acar, drejt fronteve të luftës e pritave të shumta, ku shumë nga këta atdhetar ranë gjatë luftimeve të ashpra, e të pa barabarta. Fal propagandës nihiliste e djallëzore të Albin Kurtit dhe bashkë partiakëve të tij, tani ishte shumë lehtë ta bëjë atdhetarin dhe çlirimtarin duke udhëtuar në mënyre komode me aeroplan për ta dhënë votën për këtë parti dhe për t’u ekzaltuar nga ndjesia e të qenurit çlirimtar dhe shpëtimtar i Kosovës. Më nuk të duhej as kallashi, as bombat e as municioni por mjaftonte libreza e partisë Vetëvendosje dhe flet votimi për këtë parti. Është interesante nëse analizon fotot ose videot e bëra gjatë kohës së luftës kur mijëra mërgimtar, ia mësynin fronteve të luftës dhe mërgimtarëve që ia mësynin kutive të votimit për ta sjell në pushtet, të eturin për të, Albin Kurtin me bashkë partiak. Shprehja e emocioneve të ndjenjës së krenarisë dhe ndjesisë së dhënies së kontributit për komb e vatan, është e njëjtë!!! Si e atyre që niseshin për Kosovës gjatë viteve të luftës çlirimtare, si të këtyre të kohës së votimit!!!

   Ama Kurti me shpurën e tij ja ka dal ta bëj edhe një hap tutje! Më shumë ka anëtar të kësaj partie që kanë ndjesinë e çlirimtarëve të Kosovës se sa që ka pjesëtar të Ushtrisë Çlirimtare të Kosovës që e kanë këtë ndjesi! Është e ditur se nëse ofron mundësi që me kontribut minimal ta përjetosh maksimalisht epitetin e çlirimtarit dhe shpëtimtarit të atdheut, klientelen e ke të garantuar. E këtë ka bërë shefi i partisë Vetëvendosje,  bashkë partiakët e tij të safit të parë dhe të safave pasues. Me këtë propagandë, xhematlinj ke sa të duash! Vite me radhë, këta pushtetar të etur për pushtet, kanë propaganduar se Kosova është shkatërruar për 20 vite me radhë, por kurrë nuk kanë treguar se kush na e paska ndërtuar kaq shumë Kosovën që na u paska dashur 20 vite angazhim për shkatërrimin e saj!? Pushteti i kryekriminelit të Ballkanit, Sllobodan Milosheviqit, pushteti i shqiptar vrasëse Tito – Rankoviq apo pushteti i Serbisë së Krajlit, që kishin bërë shkrumb e hi Kosovën!?

   Fatkeqësisht, shumë votues i kanë besuar kësaj propagande shtet mohuese dhe dëshira për ta ndjerë veten si shpëtimtar të kombit e vatanit, ka mbizotëruar mbi mendimin kritik. Kjo ka bërë që në vend se këtë propagandë ta marrin me rezervë, i janë dorëzuar emocioneve të këndshme që ndjen njeriu kur beson se është bërë shpëtimtar dhe çlirimtar i kombit e atdheut. Dhe Albin Kurti me oborrtarët e tij, ia ka dal të ua ofroj këto ndjesi në këmbim të votimit të partisë së tij. Për hir të së vërtetës, duhet thënë se tregti me ndjesi të tilla, kanë bërë edhe partitë tjera por asnjëra nuk ka përfituar nga kjo tregti – krijimin e ndjenjave të atdhetarisë në këmbim të votës, sikur partia Vetëvendosje!

  Por pavarësisht fitores së madhe të 14 shkurtit dhe iluzionit se kjo datë shënon edhe çlirimin dhe shpëtimin e Kosovës, vitet në vazhdim e dëshmuan të kundërtën. Ngjarjet që pasuan në vijim, na e kujtojnë se sa të drejtë kishte filozofi, politikani dhe pedagogu francez, Zhan Zhan Ruso kur shfaqte shqetësimin e tij për tjetërsimin e vullnetit të votuesve. Në librin e tij të njohur “Kontrata Shoqërore” ai në mes tjerash ngre edhe një pyetje tejet interesante! Duke folur për vullnetin e popullit, Ruso në mes tjerash shkruan:

A ka mundësi që vullneti i popullit të përfaqësohet dhe të mos tjetërsohet!?

   Nëse analizojmë partinë Vetëvendosje, lirisht mund të themi se intelektuali i shquar francez, Zhan Zhak Ruso, kishte plotësisht të drejt kur paraqiste këtë shqetësim të tij sepse asnjë parti si kjo nuk e ka tjetërsuar vullnetin e votuesve të saj.

   Ndonëse ajo për një dekadë ka bërë propagandë se me Vetëvendosjen në Qeveri, nuk do të ketë Zajednicë, ajo tani po e pranon Zajednicën ama të ambalazhuar me një nocion tjetër, ndonëse gjatë fushatës është zotuar se nuk do të zhvilloj bisedime me Serbinë pa i plotësuar ajo paraprakisht disa kushte, ka vite që më shumë takohet e bisedon me presidentin e Serbisë se sa me kryeministrin e Shqipërisë! Ndonëse shumë vite me radhë është zotuar se do ta bëjë bashkimin kombëtar dhe atë fare lehtë duke zhvendosur pikën doganore nga Vërmica pranë Shqipërisë në Merdare pranë Serbisë, me t’u ulur në kolltuk deklaroi se këtë nuk na e lejon Kushtetuta! Dikur deklaronte se nuk ecet përpara me leckën lara lara, pas veshjes me pushtet, po kësaj lecke i rri gatitu sepse me Kurtin kryeministër ajo më nuk është leckë por flamur! Partia Vetëvendosje u zotua se do ta luftoi nepotizmin por me të ardhur në pushtet, vetëm se e vazhdoi atë. Gjatë fushatës zgjedhore, shefi i partisë Vetëvendosje, Albin Kurti dhe bashkë partiakët e tij kanë zhvilluar takime me të gjitha sindikatat dhe kanë shfaq keqardhje me anë të grimasave për kushtet e rënda të anëtarësisë së këtyre sindikatave. Ndonëse janë zotuar se me të ardhur në pushtet, do të angazhohen për plotësimin e kushteve të tyre, pas uljes në kolltuqet e buta që ofron pushteti, më as nuk i takojnë këto sindikata por i akuzojnë se janë dorë e zgjatur e atyre që e kanë shkatërruar këtë vend. Dikur kritikonte me të drejt dhe arsye të tjerët kur ju mbesin qindra miliona euro suficit ( para të pashpenzuara ) ndërsa tani Qeverisë Kurti i mbesin afër 1 miliard euro subvencion!!!

  Dhe kur kujton njeriu se çka ka ndërtuar Qeveria e Shpresës për këto tri vite, gjëja e parë që të vije në mendje është ura e Saradranit! Çuditërisht edhe ajo është e gjerë tri metra ama e bërë me standarde të Bashkimit Evropian, me rrethoja të metalta anash, në përurimin e së cilës, morën pjesë i madh e i vogël i kësaj Qeverie që na e solli ditën me prit tri vjet për ta ndërtuar një urë tri metra! Është e gjatë lista e shembujve të tjetërsimit të vullnetit të votuesve të saj nga partia Vetëvendosje! Është ndjenjë e keqe kur nuk ke më arsye dhe asnjë fakt për t’u ndjerë çlirimtar dhe shpëtimtar i atdheut por kontribuues i vendosjes së një partie që ta ka tjetërsuar vullnetin tënd.

Kontrolloni gjithashtu

Në fshatin Berishë filloi hapja dhe zgjerimi i rrugës, e cila shkon në vendin, ku në 3 muajt e fundit të luftës, ka transmetuar program Radio-Kosova e Lirë

Sot në fshatin Berishë në Komunën e Malishevës, filloi hapja dhe zgjerimi i rrugës, e …