Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Forca e Sigurisë së Kosovës pritet të përmbyllë në vitin 2028 procesin dhjetëvjeçar të transformimit në një forcë moderne mbrojtëse me kapacitete të plota ushtarake, një etapë që konsiderohet vendimtare për zhvillimin e sektorit të sigurisë në vend. Gjatë këtij procesi, FSK-ja ka zgjeruar misionin e saj, ka rritur numrin e pjesëtarëve, ka investuar në pajisje dhe trajnime, si dhe ka forcuar bashkëpunimin me vendet anëtare të NATO-s. Pjesëmarrja në misione ndërkombëtare, përfshirë atë në Gazë, vlerësohet si një ndër sukseset kryesore të ngritjes së kapaciteteve operacionale. Njohësit e sigurisë vlerësojnë se përmbushja e standardeve ushtarake nuk është e mjaftueshme për anëtarësim në NATO. Sipas tyre, pengesa kryesore mbetet dimensioni politik, pasi pranimi i Kosovës kërkon miratimin unanim të vendeve anëtare të Aleancës, ndërsa disa prej tyre ende nuk e njohin pavarësinë e Kosovës. Ekspertët shtojnë se angazhimi i FSK-së në misione ndërkombëtare forcon kredibilitetin e saj dhe mund të përshpejtojë rrugën drejt Partneritetit për Paqe, si një hap i rëndësishëm drejt integrimit të plotë në NATO. Pavarësisht progresit të arritur në ngritjen e kapaciteteve mbrojtëse, rruga e Kosovës drejt Aleancës Veri-Atlantike do të varet njëkohësisht nga përmbushja e standardeve ushtarake dhe nga mbështetja politike e shteteve anëtare.
