Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Tani që i ka ardhur fundi i gënjeshtrave dhe i mashtrimeve, tani kur doli gjithçka në shesh dhe që është zier në kazanin e tij të intrigave politike për shumë kohë, kryeministri, Kurti, pezmatohet kundër Hashim Thaçit, i cili sipas tij paska nënshkruar që ushtria e Kosovës të mos e ruajë kufirin. Kjo nënkupton se po të kishte pasur Kosova ushtri në Kufi, Serbia nuk do të pipëtinte dhe kjo dihet fare mirë, sepse po të kishte qenë atje, do të kishte qenë e mbrojtur nga forca ushtarake e KFOR-it, e cila është e vetmja ushtri, që operon në Kosovë dhe nuk i merr leje Albinit as Vjosës, as xhelë ministrit dhe askujt tjetër, sepse ka mandat nga OKB-ja dhe ka një rezolutë së cilës i përmbahet, që nga qershori i viti 1999.
Ditë më parë ndodhi që deputeti i PDK-së, Ferat Shala kishte pyetur Kurtin për deklaratat e para, të bëra kur ka ndodhur rasti, e kur Kurti kishte thënë se terroristët i kanë vetëm dy opsione, meqë janë të rrethuar dhe ose duhet të dorëzohen, ose do të asgjësohen. Deputeti i PDK-së Shala ka ngritur shqetësim për sigurinë e asaj pjese duke thënë se si ka qenë e mundur që janë futur një numër aq i madh i paramilitarëve serbë. Kurti në fjalën e tij ka thënë se vija kufitare në atë pjesë është shumë e gjatë dhe se kufiri në Leposaviq , Zubin Potok e Zveçan do të duhej të ruhej nga ushtria. Por sqaron se sipas tij ish-presidenti Hashim Thaçi në vitin 2013 kishte çuar letër tek NATO-ja që Ushtria nuk e kalon Ibrin. Kryeministri ka thënë se ajo letër edhe tani po i kufizon raportet me NATO-n dhe sipas Kurtit ishte një veprim katastrofal i Hashim Thaçit, sepse po të mos ishte ajo letër, Ushtria do të ishte në Veri të Kosovës.
Kurti nuk ka përmendur fare ushtrinë e vetme që vepron në Kosovë dhe që është forca ushtarake e KFOR-it, nën flamurin e së cilës vepron policia e ministër Xhelalit, e kur zihet ngushtë dhe duhet të përleshet me serbët, shkojnë dhe e nxjerrin nga katastrofa ushtarët e KFOR-it duke rrezikuar jetët e tyre.
Ja se çfarë hipokrizie është në gjendje ta nxjerrë në sipërfaqe i pari i Qeverisë së Kosovës, i cili mendon se me ushtrinë që e kemi, madje pa praninë e NATO-s fare lehtë mund të ballafaqohemi me Serbinë. Këtë naivitet prej një zevzeku delirant nuk e beson as populli i Vetëvendosjes, por Kurti nuk i mban dot në duar patatet e nxehta dhe ato ia adreson, Hashim Thaçit, të cilin vazhdon ta përbuzë, pa marrë parasysh pozitën e tij, as akuzat e Gjykatës Speciale e cila UÇK-së e quan organizatë kriminale. Për të gjitha lëshimet, dështimet dhe pamundësinë për të ndërruar pozitën e Kosovës në bisedime me Serbinë, ai vazhdon ta akuzojë Hashim Thaçin e Isa Mustafën. Dhe si hipokrit që është mendon se askush nuk e di deklaratat e tij gjatë fushatës zgjedhore. Ato nuk harrohen, sepse janë kumtuar publikisht, janë incizuar, ruhen dhe mund të postohen pa asnjë vështirësi.
Duke shkruar për këto sulme të ulëta të Albin Kurti drejtuar Thaçit e PDK-së, Ish-deputetja e kësaj partie, Besa Ismaili, në një postim të saj drejtuar kryeministrit, Albin Kurti ka shkruar se nuk po na kërkon Vuçiqi e Serbia në Bruksel, por po na kërkon në Hagë. Ajo ka theksuar se nga padrejtësia, si një formacion i rënduar mbi çlirimtarët në radhë të parë, e pastaj te qytetarët dhe shteti në tërësi, ka kaluar në përndjekje. Tërë javës pamë përndjekje, madje edhe të ish këshilltarëve të çlirimtarëve. Tërë javës pamë seanca gjyqësore, që shpalosnin dosje të ziera nga kuzhinat e Vuçiqit dhe prokurorisë së Serbisë. Pikërisht dje u arrestua komandanti i zonës së Malishevës, Isni Kilaj. Për ironi, me të qeshur nëpër dhëmbë dhe sytë e drejtuar kah Partia Demokratike e Kosovës, kryeministri Kurti në Kuvend po bërtiste: ‘Po ju kërkon Vuçiqi!’.
Gjuha e tij antikombëtare në kuvend është e papranueshme. Kurti do të duhej të ishte kundër Vuçiqit dhe Serbisë që nuk heqin dorë nga shpifjet dhe nuk po heqin dorë së kërkuari që gjithë çlirimtarët të përndiqen e të dënohen në Hagë. Sepse, realiteti po e tregon çdo ditë dhe historia do ta dëshmojë se, Vuçiqi po e kërkon Partinë Demokratike të Kosovës, si pasardhësen kryesore të UÇK-së, në Hagë, nuk po e kërkon në Bruksel! Në Bruksel, për fatkeqësinë e Kosovës, Vuçiqi dhe Serbia, si dhe gjithë bashkësia ndërkombëtare, e kanë pikërisht atë që deshën ta kishin, e që nuk do të gjenin dot një më të mirë sesa Albin Kurtin me kompaninë e tij ka shkruar ish-deputetja Besa Ismaili.
Po kështu, në përpjekje për të krijuar mjegull, dhe sa më shumë ndasi e përçarje kombëtare, Gjatë fjalës para pjesëmarrësve në mbledhjen e Vetëvendosjes, Albin Kurti ka folur mes tjerash edhe për Gjykatën Speciale në Hagë, ku po gjykohen e po mbahen me pa të drejtë në burg, drejtuesit e Ushtrisë Çlirimtare të Kosovës. Por nga shumë të burgosur që po mbahen atje, Kurti ka vënë theksin vetëm te Rexhep Selimi. Para se të flasë për të arriturat, rezultatet dhe sukseset e qeverisjes sonë dëshiroj të kujtoj me mall mikun dhe bashkëveprimtarin tonë, luftëtarin e lirisë, 10-shin e Ushtrisë Çlirimtare të Kosovës, Rexhep Selimi. Rexhep Selimi tash e tre vjet po vuan në burgun e Hagës. Deputeti i ynë qysh në 2010-n, kur edhe së pari vendosi të marrë pjesë në zgjedhje, gjithmonë fitimtar, gjithmonë çlirimtar. Mezi presim të na kthehet” theksoi mes tjerash, kryeministri, Albin Kurti, por nuk shfaqi dëshirë për kthimin në Kosovë edhe të të burgosurve tjerë, madje si gjithnjë duke mor u përmendur as emrat. Kjo deklaratë ku ndahet dhe përmendet me emër vetëm Rexhep Selimi, është hiq më pak se idiotike, përçarëse, arrogante. Kjo është fytyra e vërtetë e Albinit. Kjo deklaratë është e rëndë për Rexhep Selimin, sepse ai atje në Hagë e ka shumë më afër Hashim Thaçin, e të tjerët se Kurtin e të gjithë kurtiçit e tij.
Kurti, gjatë fushatës zgjedhore ishte betuar se nuk do të bisedonte me Vuçiqin, se të gjitha vendimet që i kishin marrë qeveritë paraprake nuk do të zbatoheshin, se kurrë nuk do të lejonte të themelohej Asociacioni, të cilin me cinizëm e quante zajednicë, por tani doli se në të vërtetë kishte qenë një zajebnicë që ishte ruajtur pikërisht për Kurtin dhe për ata që ende po ia mbajnë ison.
Duke thurur vargje për hipokritët e lepe-peqet e kohës së tij, Noli i madh kishte ironizuar Faik Konicën kundërshtarin e Ahmet Zogut, por kur ai erdhi në pushtet me gjak e dhunë dhe ia dha një post ai e ndërroi qëndrimin dhe filloi ta lavdërojë mbretin e vetëshpallur.
Dhe Feridi faqe ndërron,
Dje shante sot lavdëron,
Fryn bulçitë e trumpeton,
Që katrani zbardhëllon.
Albinit sot i shkojnë për shtati këto vargje analoge:
Dhe Albini faqe ndërron,
Hiq pa turp po deklaron,
Zajednica po kalon,
nuk ka forcë që e ndalon.
Ahmet Qeriqi
6. 11. 2023
Prishtinë
