Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas një zgjatje disa vjeçare, dje në Shkup është vendosur përmendorja e tretë shqiptare në kuadër të projektit ‘Shkupi 2014’. Përmendorja e Nexhat Agollit është vendosur në afërsi të ndërtesës së Telekomit në sheshin ‘Maqedonia’. Kjo është përmendorja e tretë shqiptare në mesin e qindra sosh nga historia sllave që kanë uzurpuar qendrën e Shkupit. Përmendorja e humanistit shqiptar, Pjetër Bogdani gjendet përballë Kuvendit të Maqedonisë, kurse ajo e rilindësit, Josif Bageri është e vendosur në afërsi të Teatrit të Maqedonisë. Përndryshe, Nexhat Agolli ka qenë një nga figurat më të spikatura shqiptare gjatë Luftës së Dytë Botërore në Maqedoni. I lindur me 1914 në Dibër, Agolli kishte studiuar në Romë, ku për një kohë pati shërbyer edhe si profesor universitar. Ai iu bashkëngjit radhëve të Lëvizjes Nacional-Çlirimtare Shqiptare, ndërkohë që u bë një nga figurat kryesore anti-fashiste në Maqedoni. Aktiviteti i tij u bë halë në sy për strukturat e UDBA-s, të cilët në prill të vitit 1949 e burgosën e dy muaj më vonë e pushkatuan me pretekstin se ishte kundërshtar i pakompromis i fraksionit të Titos.
