Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetët e PDK-së, Ganimete Musliu dhe Fadil Demaku, e kanë lëshuar mbledhjen e Komisionit për Administratë Publike, duke kundërshtuar vazhdimin e punës me agjendë rutinore. Musliu ka argumentuar se vazhdimi i punëve rutinore parlamentare, në një kohë kur në opinionin publik po rritet kërkesa për veprim institucional lidhur me Ligjin për Dhomat e Specializuara, do të krijonte përshtypjen se Kuvendi po funksionon sikur vendi të mos përballej me një çështje të ndjeshme politike dhe institucionale. Sipas saj, Kuvendi duhet ta trajtojë këtë çështje si prioritet dhe jo ta shtyjë atë pas agjendave të zakonshme të komisioneve. Në të njëjtën linjë është shprehur edhe Fadil Demaku. Ai ka kërkuar që deputetët të gjejnë një qëndrim të përbashkët dhe të përqendrojnë punën parlamentare në procedimin e projektligjit për ndryshimin dhe plotësimin e Ligjit për Dhomat e Specializuara. Qëndrimi i dy deputetëve të PDK-së e ka kthyer mbledhjen e komisionit në një tjetër pikë përplasjeje politike, duke nxjerrë në pah dallimin mes agjendës institucionale të Kuvendit dhe kërkesave politike që po adresohen për çështjen e Speciales. Megjithatë, Musliu dhe Demaku nuk kanë pranuar ta vazhdojnë pjesëmarrjen në mbledhje dhe janë larguar nga salla. Përplasja e sotme tregon se debati për ndryshimin e ligjit për Specialen tashmë po ndikon drejtpërdrejt edhe në funksionimin e punës së komisioneve parlamentare, ndërsa mbetet për t’u parë nëse kërkesa për një qëndrim të përbashkët të deputetëve do të prodhojë veprim konkret institucional.
