Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetja e Partisë Demokratike të Kosovës, Blerta Deliu-Kodra, ka bërë të qartë se partia e saj nuk do të jetë pjesë e asnjë marrëveshjeje politike me Lëvizjen Vetëvendosje për formimin e institucioneve të reja, duke konfirmuar se PDK do të mbetet në opozitë. Sipas saj, pas takimit ndërmjet kryetarit të PDK-së, Bedri Hamza, dhe kryeministrit në detyrë, Albin Kurti, është sqaruar përfundimisht pozicioni politik i partisë. “Pas takimit të Bedri Hamzës me Albin Kurtin është qartësuar gjithçka. Do të jemi në opozitë dhe nuk bëhemi pjesë e asnjë matematike politike për zhvillimet e fundit”, deklaroi Deliu-Kodra. Ajo theksoi se PDK ka qenë konsistente në qëndrimet e saj gjatë gjithë procesit paszgjedhor, duke nënvizuar se orientimi politik i partisë është përcaktuar qartë dhe nuk ka ndryshuar. Deputetja e PDK-së kritikoi gjithashtu mungesën e iniciativës nga partia fituese për formimin e institucioneve të reja, duke thënë se që nga përfundimi i zgjedhjeve nuk është parë vullnet politik për zgjidhjen e ngërçit institucional. Deliu-Kodra rikujtoi se e drejta për të propozuar kandidatin për kryetar të Kuvendit i takon partisë fituese, ndërsa seanca e ardhshme, sipas saj, do të jetë procedurale. Në përfundim, deputetja ritheksoi se PDK do ta ushtrojë rolin e saj si forcë opozitare në Kuvend, duke përjashtuar mundësinë e përfshirjes në një koalicion qeverisës me Lëvizjen Vetëvendosje.
