Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me pranimin paraprak të kryeministrit Sali Berisha dhe me aprovimin unanim të deputetëve të Kuvendit të Shqipërisë, misioni i BE-së në Kosovë, EULEX, merr leje zyrtare për fillimin e hetimeve në territorin e Shqipërisë, në lidhje me pretendimet se gjatë luftës në Kosovë, në njërin prej spitaleve të UÇK-së, në Burrel, qenkan kryer trafiqe organesh, duke u bazuar në raportin e kryesuesit të Këshillit të Evropës, Dik Marti. Por disa juriste të kontaktuar nga “Top-Channel” pohojnë se ky ligj cenon drejtpërsëdrejti të drejtat dhe liritë e garantuara me kushtetutë të qytetarëve shqiptarë.
Problemet nisin që me nenin 9-të këtij ligji, ku e ashtuquajtura task-forcë e EULEX-it dikton hapat që duhet të ndërmarrë gjyqësori në Shqipëri “Autoritetet gjyqësore lokale, në rastin e veprave penale kundra njerëzimit, krimeve të luftës ose krimeve të tjera të rënda kundër vlerave që mbrohen nga drejtësia ndërkombëtare, tentativave për kryerjen e tyre si dhe bashkëpunimin në kryerjen e këtyre veprave penale nuk mund të refuzojë letër-kërkesat me shkakun se ato përbëjnë vepra penale me karakter politik”. Ky nen vlerësohet nga juristët si një imponim sesi duhet të sillen gjyqtarët shqiptarë kur në fakt është vetë Bashkimi Evropian që në të gjitha raportet e saj vlerëson dhe kërkon që gjyqësori është një pushtet i pavarur, raporton Top Channel.
Edhe neni 15 i këtij ligji, për kontrollet dhe arrestimet në territorin shqiptar sipas juristëve, janë tejet shqetësues. “Task Forca Hetimore Speciale e EULEX-it ka autoritet të pavarur: të dëgjojë dëshmitarë, ekspertë dhe persona të akuzuar në Shqipëri; të kontrollojë mjedise; të marrë prova të tjera dhe të mbajë çdo dhe të gjitha materialet që janë të rëndësishme për hetimin dhe gjykimin, në pajtim me këtë ligj. Të ndërmarrë ato veprime dhe aktivitete të tjera që mund të jenë të nevojshme për përfundimin e hetimit dhe përgatitjen e zhvillimin e ndjekjes penale në gjykim, në pajtim me kufizimet e përcaktuara në pikën 4, të këtij neni. Këto veprime mund të ndërmerren, sipas rastit, për përfundimin e hetimit dhe përgatitjen e zhvillimin e ndjekjes penale në gjykim, edhe nëse këto nuk cenojnë vullnetin e lirë të individit”, shkruhet në dokument. Juristët e komentojnë këtë nen si jo të plotë, pasi nëse task-forca e EULEX arreston një shtetas shqiptar me dyshimin e përfshirjes në tregtinë e organeve dhe më pas rezulton se ky person është i pafajshëm, për shkak të gabimeve të EULEX, duhet të jetë shteti shqiptar që të marre përsipër dëmshpërblimin e tij.
Një tjetër pikë që sjell dyshime dhe lë shume hapësirë për interpretim është edhe mënyra e ndalimit ose arrestimit të personave në territorin shqiptar, të cilët mund të kryhen në përputhje me legjislacionin shqiptar, por në të njëjtën kohë në ligj thuhet se autoritetet shqiptare mund të asistojnë në aktivitetin e task-forcës, nëse këtë e kërkon kjo e fundit.
Qeveria e Shqipërisë, servile dhe e vetë-nënshtruar ndaj Bashkimit Evropian, nuk e ka për pesë para që për hir të disa lavdërimeve dhe kurtuazisë fodulle diplomatike, ta bëjë pre derri vendin dhe qytetarët e saj, të cilët padrejtësisht do t’ iu nënshtrohen dyshimeve hetimeve dhe keqtrajtimeve të Prokurorisë së Serbisë, në dosjet e të cilave bazohet Dik Marti dhe EULEX-i. Duke u mbështetur në dosje të tilla EULEX-i ka hetuar, ka shpallur fajtorë dhe ka dënuar qindra shqiptarë, ish pjesëtarë të Ushtrisë Çlirimtare të Kosovës për shkak se kanë qenë pjesëmarrës në luftë dhe për shkak se kanë vrarë serbë apo kolaboracionistë shqipfolës. Leja, që Qeveria e Shqipërisë i ka dhënë EULEX-it për hetime shkel kushtetutën e vendit, devalvon sovranitetin dhe shkel moralin kombëtar të shqiptarëve, duke lejuar të vihet në dyshim lufta kombëtare për çlirim nga barbaroidët serbë.
Me veprime të tilla nënshkruese, Berisha pretendon të mbetet më tej në pushtet, tani kur po kritikohet nga BE-ja dhe nga Amerika. Për interesat të tij, ai po vepron ashtu sikur kanë vepruar dikur: Ahmet Zogu, Esat Pashë Toptani, Ceno beg Kryeziu, Xhafer Deva e bashkëpunëtorë të tjerë të serbëve, italianëve e grekëve.
Me lejen e shtetit shqiptar, Serbia po arrin, që përmes EULEX-it, të shtrijë hetimet e paragjykuara edhe në Shqipëri, ku edhe kanë filluar dyshimet e para për, sikur thuhet, trafik organesh, disa vite më parë. Ishin pikërisht disa përkthyes e gazetarë të korruptuar shqiptarë, të cilët kryen hetime të pavarura, vetë-tiposën disa njolla të zeza, lansuan disa të pavërteta, në mënyrë që mediet e Beogradit dhe ato që e mbështesin politikën antishqiptare të Serbisë, të krijojnë tema sensacionale për gjoja trafikim të organeve nga UÇK-ja, gjatë kohës së luftës. Se a ka pasur mundësi minimale për të ndërmarrë veprime të tilla kirurgjike në shtëpinë përdhese të një fshati, në Shqipëri, këtë ide monstruoze e kanë injoruar edhe kirurgët serbë të Beogradit. Por as kjo nuk ka rëndësi. Rëndësi ka fakti që Serbia nga banka e akuzuar për krime luftë dhe krime kundër njerëzimit, ka arritur të bëhet prokurore, duke fajësuar viktimat shqiptare, myslimane dhe kroate, që paskan kryer krime kundër serbëve, duke akuzuar NATO-n si organizatë ushtarake terroriste po ashtu edhe UÇK-në. Serbia ka arritur mjaft në këtë luftë jo vetëm propaganduese, falë mungesës së gatishmërisë së politikanëve shqiptarë për kundërpërgjigje dhe kundërvënie, falë qeveritarëve tanë në Tiranë, në Prishtinë dhe në Shkup, të cilët mbrojnë interesat e pronat e tyre po jo interesin kombëtar të shqiptarëve.
Fushata kundër UÇK-së madje edhe në Kosovë tashmë e ka arritur kulmin. Për çdo ditë gazetat e njohura për shkrime sensacionale si “Koha Ditore”, “Bota Sot” “Zëri” dhe disa portale pirateske, që vjedhin shkrime autoriale dhe rrojnë si mizat e kalit, qëndisin faqet e tyre me lajme sensacionale, duke u mbështetur në burime anonime, madje në burime shumë të sigurta, pasi që tashmë janë siguruar se me heqjen e neneve penale 37 e 38 të kodit të Ri penal të Kosovës, ata marrin rolin e gazetarëve hetues, ( jo hulumtues) që punojnë për shërbimin sekret të mediumit, i cili i paguan sipas “prurjeve”, pavarësisht vërtetësisë së fakteve.
Fushata lidhur me pretendimet fashistoide të Dik Martit, të Beogradit dhe Kremlinit po bëhet në kohën kur Qeveria, Presidenca dhe Kuvendi i Kosovës, tashmë iu kanë nënshtruar politikave “të moderuara” dhe “të emancipuara” të Bashkimit Evropian, i cili kërkon modelimin e një Kosove të vërtetë multietnike, tërësisht anacionale, me qëllim për të lënë anash dhe për të harruar krejtësisht të kaluarën, për hir të pajtimit të shqiptarëve me serbët, edhe pse janë serbët ata që nuk e duan pajtimin, sepse për politikanët kurriz-kërrusur shqiptarë, tashmë ishte harruar moti armiqësia shekullore, krimet monstruoze, dhe pësimet fatale që kemi pësuar nga fqinjët grabitqarë.
