Si po ballafaqohet Albin Kurti me kërkesën e serishme të emisarit, Gabriel Escobar, për ta hequr policinë dhe kryetarët nga komunat e veriut?

06/06/2023 Analiza

Tema të tjera...

Shkrimtari i madh boshnjak, Mesha Selimoviq, në romanin “Kështjella” duke bërë fjalë për konfliktet e përhershme të forcave kundërshtare, ka shkruar: “Çdo mbretëri e mençur e krijon për vete një “Hoxhin” (një mollë sherri) një vend krize të vazhdueshme, ku e derdh gjakun e keq të popullit të vet”. Hoxhini, diku në Bosnje ishte një vend ku kriza dhe luftërat mes Perandorisë Osmane dhe forcave evropiane, kishin zgjatur për shumë kohë, një vend ashtu sikur sot Bakhmuti i Ukrainës, apo i Rusisë. Edhe katër komunat e veriut të Kosovës, prej 15 qershorit të vitit 1999, kur kufirin mbi Lumin Ibër në qendër të Mitrovicës e vendosen ushtarët francez të KFOR-it, vazhdon të jetë një “vilajet” i padefinuar, një mollë sherri jo vetëm në mes të Kosovës e Serbisë, por duke e parë më gjerë, një vend një zonë kufitare ku atakohen herë pas herë Lindja e Perëndimi, ndërsa në rastin vendor kemi katër komuna me shumicë serbe, të cilat në asnjë mënyrë nuk pranojnë të jetojnë nën qeverisjen e Kosovës, duke përdorur analogjinë, që nuk është pa domethënie: “Nëse ju shqiptarët shumicë nuk deshët të jetonit nën Serbinë, përse ne serbët shumicë në këto katër komuna u dashka të jetojmë nën Qeverisjen e Kosovës? Nëse ju keni luftuar dhe i keni fituar me luftë, ne jemi të gatshëm të luftojnë dhe të çlirohemi, por meqë luftën nuk po e duam, atëherë ndahemi paqësisht, fillimisht me një Asociacion, më vonë shohim e bëjmë…

Manovrat e kryeministrit Albin Kurti tani janë në kulmin e kalkulimeve të tij dhe katër pesë ministrave e deputetëve, me të cilët është angazhuar në stilin e veprimit “mishi të piqet, por helli të mos digjet”. Atij tani i kanë mbetur vetëm fjalët, nocionet e reja e të vjetra për t’ i lakuar ato në të gjitha rasat, për t’ i ndrydhur e për t’ i shtrydhur, me qëllim për të krijuar përshtypjen se ai i di të gjitha, se nuk e ka shkelur asnjë premtim, se për Republikën e tij të tretë demokratike, nuk ia var as Amerikës, se është aq trim, aq i zoti, aq super politikan sa di të notojë pa u lagur në çdo situatë. Për Albinin është me rëndësi që qëndrimin e tij ta besojë populli i Vetëvendosjes, i cili e ka emëruar kryeministër e jo Daja Hovenier, as kumbara Borell, as komshia Vuçiq.

Kurti ndodhet në trans, në një gjendje tejet të rënduar të tensionit, i cili sa vjen e rritet, në një situatë kur mendon se mundet kundër krejt botës, duke iu mbajtur leksione për demokracinë, më të mirën në rajon dhe në Evropë, sikur ai pretendon, sepse ai mendon se është vetë më i miri, më pehlivani dhe më i adhuruari nga krejt kryeministrat e deritanishëm. Transi i Kurti po shkon drejt delirit e deliri dihet se mbaron fillimisht me agoni e pastaj me çmenduri.

Dhe ja cilat janë vetëm disa simptoma të kësaj çmendurie tipike albiniane. A nuk është çmenduri më shumë se naivitet, t’ i thuash naiv që nuk kupton politikën drejtuesit të Departamentit amerikan të Shtetit? A nuk është budallallëk me bollëk t i thuash ambasadorit Hovenier se dy kryetarët i mi të Vetëvendosjes, në komunat e veriut nuk mund të vinë në takim me ty, pasi janë në orar të punës dhe kanë aq shumë punë sa nuk u dihet fundi. A nuk ishte çmenduri koha kur ai shtrembëronte gojën dhe bërtiste: Amelika, Amelika.

Po si do t ia bëjë tani, Albin trimi, kur emisari amerikan për Ballkanin, Gabriel Escobar, ka thënë se kryeministri Albin Kurti duhet t’i largojë kryetarët e komunave dhe ta tërheqë policinë, dhe pastaj ta fillojë “urgjentisht, urgjentisht” punën për Asociacionin. Këto i tha Escobar në një intervistë për BBC Radio, ku pas tij menjëherë edhe Kurti ishte në intervistë, për të komentuar ngjarjet në veri të vendit. “Ky eskalim ishte rezultat pjesërisht i pagatishmërisë nga ana e Kosovës për të dëgjuar komunitetin ndërkombëtar. Përpjekjet tona për t’u koordinuar me Qeverinë e Kosovës u refuzuan. Nuk kishin nevojë të shkonin në ato objekte, nuk kishin ndonjë vlerë dhe tashmë janë gati te zbrazura. Albin Kurti duhet t’i largojë kryetarët nga objektet komunale, duhet të largojë Policinë nga ndërtesat dhe pastaj urgjentisht, urgjentisht të fillojnë diskutimet për punën e Asociacionit të Komunave me shumicë serbe”, ka thënë Escobar.

Dhe ja si u shpreh Albini i fjalëve të mëdha

Unë kryeministri, Albin Kurti, nuk mund të bëj kompromise për Republikën demokratike të Kosovës. Nuk mund të bëj kompromise për Republikën demokratike, duke qenë kryeministri i vendit më demokratik në Ballkanin Perëndimor, me policinë më profesionale e cila është e orientuar dhe trajnuar nga Perëndimi. Presidenti Vuçiç është një autokrat që nuk i lejon serbët në Kosovë të kenë më shumë se një parti. Serbët në Kosovë përbejnë 4% të popullatës ndërsa populli i Kosovës 93% , kemi edhe minoritete të tjera të neglizhuara nga komuniteti ndërkombëtar. Pra 4% e popullsisë serbe kanë drejtimin e 10 nga 38 komunat, kanë 10 vende të rezervuara në parlamentin e Kosovës dhe qeveria jonë e ka të detyrueshme që në kabinet të kemi një ministër serb. Unë e kam atë ministër, është Nenad Rashiç. Ai nuk është në partinë e Vuçiqit dhe sot është personi më i urryer në Serbi, tha Albin Kurti. Njeriu më i urryer në Serbi, është i njëjtë për Serbinë, sikur ishte dikur Rrahman Morina, miku më i madh i serbëve dhe më i urryeri, në Kosovë, për më shumë ai ishte edhe dhëndër i Serbisë.

Ja çfarë ka deklaruar emisari amerikan, Gabriel Escobar, për kryeministrin, Albin Kurti në një intervistë për gazetën austriake, “Die Presse”. Ai ka folur rreth tensioneve të fundit në pjesën veriore dhe kërkesës së Serbisë për formimin e Asociacionit të komunave me shumicë serbe. Për Asociacionin, Escobar ka thënë se kjo nuk është një temë ndërmjet kryeministrit, Albin Kurtit dhe atij të Serbisë, Vuçiq por ndërmjet Kosovës dhe Serbisë. Edhe nëse nuk do Kurti, ky asociacion do të vijë. Pyetja është: a dëshiron Kosova të presë integrimin euroatlantik derisa kryeministri i saj të përmbushë detyrimet e tij ligjore? Gabriel Escobar ka ritheksuar se Asociacioni nuk do të jetë një Republika Serbe por që është një obligim ndërkombëtar të cilin Kosova e ka marrë mbi vete. Themelimi i Asociacionit të komunave me shumicë serbe në Kosovë është një angazhim ndërkombëtar, ligjërisht i detyrueshëm. Nëse Kosova nuk dëshiron një Republikë të re serbe si Bosnja, duhet të na japë një ide se çfarë dëshiron. Na thanë atë që nuk duan. Tani ata duhet të na thonë se çfarë duan. Ne jemi duke pritur. Escobar ka folur edhe për sanksionet e fundit të vendosura ndaj Kosovës, por edhe për raportet me Beogradin zyrtar. Ka një ndryshim të madh në marrëdhëniet tona me Serbinë dhe Kosovën. Tradicionalisht, Kosova ka lidhje të ngushta me Shtetet e Bashkuara dhe ne i dëshirojmë ato gjithashtu. I themi Kosovës: asociacioni i komunave nuk është koncesion ndaj Serbisë. Bëhet fjalë për mënyrën se si Kosova e trajton grupin e saj etnik serb. Nga këndvështrimi ynë, mosgatishmëria e Prishtinës për të lëvizur këtu tregon mungesën e vullnetit për t’u përpjekur për pajtim me vendin tonë, deklaroi Escobar.

Albin Kurti edhe kësaj radhe duket se ka vendosur të shpërfillë kërkesat amerikane, duke luajtur lojën e rrezikshme, “krejt ose hiq”. Të ishte sa për Albin Kurtin si politikan, kjo nuk do të kishte fare rëndësi, por këtu bëhet fjalë për qëndrimin e Qeverisë së Kosovës, për pasoja të mbarë popullit dhe jo vetëm për ata që ia kanë dhënë besimin, Albin Kurtit.

Ahmet Qeriqi