Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Edhe 21 vite pas luftës dhe 12 viteve pas shpalljes së Pavarësisë së Kosovës, vendi ynë nuk i ka zgjidhur problemet e brendshme as të jashtme, në mungesë të një vizioni të çartë kombëtar dhe në mungesë të një programi unik mbi të ardhmen, i cili do të buronte nga një referendum gjithë-popullor, si përcaktim i së drejtës së një populli i cili jeton në pesë shtete dhe është pajtuar me këtë përdhunim barbar historik, të cilin ua ka caktuar Evropa.
Pikërisht për këtë mungesë uniteti, ne jemi unik vetëm në një kërkesë dhe ajo është vetëm liberalizimi i vizave, që nga politika jonë e trekëndëshit: Tiranë-Prishtinë-Shkup, cilësohet si arritja më e madhe, parajsa e vetme tokësore, ku synon jo populli shqiptar, por politika shqiptare, me qëllim që me servilizmin që i drejtohet autoriteteve të caktuara të Evropës, ta marrë bekimin e saj, për të qëndruar në pushtet dhe asgjë më shumë.
Kjo dalldi nonsens për liberalizimin e vizave, nuk buron nga populli i lodhur, sepse ai e di se nuk ka çka pret prej këtij mashtrimi, sepse të shëtisësh nëpër rrugët e Evropës pa euro në xhep, dihet se ku mbaron. Asnjë të mirë shqiptarëve nuk u sjellë liberalizimi, pasi nuk sjellë punë, nuk sjellë ndihma humanitare, nuk sjellë pozitë më të mirë sociale, por lë anash vetëm torturën para zyrave të shteteve Evropiane në Prishtinë, dhe përgatitjen paraprake të një krahu me dokumente, pastaj zhgënjimin e 80 për qind të atyre që kërkojnë viza dhe nuk i marrin ato. Por ne jemi mësuar me këto pritje, dhe as na bëjnë fare përshtypje. Edhe ashtu jemi popull i vonuar me fajin tonë dhe të botës mujshare. Jemi bëtë aq të adaptuar në pritje, sa nuk na bën fare përshtypje. Kjo është gunga jonë që e mbajnë mbi supe dhe nuk na bëhet vonë, sepse është bërë pjesë e qenies.
Pse politikanët tanë aq shumë i fryjnë borisë së liberalizimit?
Nuk është hera e parë po as e fundit që politikanët tanë kapen për liberalizimin e vizave si të arriturën më të madhe të tyre, meqë derisa ka premtime, ka edhe gënjeshtra, mashtrime, manipulime, abuzime të lloj-llojshme. Secili nga politikanët tanë kur vjen në pushtet, gjënë e parë që premton është liberalizimi, në afatin e tij të qeverisjes dhe kurrë e në asnjë rast nuk i shpjegohet popullit çka do të thotë liberalizim dhe çka fitojnë shqiptarët kur me “pesë kopetë e tyre” të hyjnë në “kopenë e madhe” të quhet, Bashkim Evropian.
Ata fitojnë lëvizjen pa viza dhe shumë detyrime të tjera që nuk i ka plotësuar dhe as i plotëson asnjë shtet. Çka fitoi Shqipëria nga liberalizimi, përveç largimit të dhjetëra mijëra qytetarëve të mashtruar se në vendet e BE-së, është parajsa tokësore, që ofron të gjitha mundësi, krejt deri në momentin kur secili ballafaqohet me anën tjetër të medaljes.
Natyrisht se në Evropën “nënë e njerkë” në të njëjtën kohë, gjendet punë në të zezën, ka plot mbetje xhirizesh që Evropa nuk i pastron vetë, ka punë me shata e lopata, funksionojnë të gjitha trafiqet që i shpikur “inteligjencia kapitaliste” është tërë një botë që të verbon dhe t’ i merr mendtë me reklama, me lakuriqësi, me ndragie, me oferta ndër më të ndryshme, ndër më joshëset, sidomos për të rinjtë që manipulohen lehtë nga reklama e pa shpirt e kapitalizmit vulgar e virulent, që t’ i hapë të gjitha dyert, ashtu sikur bën merimanga me thurjen e rrjetit të saj, pastaj fillon të shtrëngojë e të shtrëngojë deri sa të ngulfat, ose derisa sa të bën të përdorshëm dhe të shpërfytyruar në shumë segmente, pastaj hë hedh rrugëve.
Kosova është shteti që ka pritur më shumë se kushdo liberalizimin e vizave, është i vetmi popull e vend në kontinentin e Evropës, që nuk i ka plotësuar kushtet për liberalizim, sepse Evropa kërkon nga Kosova të pajtohet me çdo kusht me Serbinë, duke bërë koncesione, marrëveshje të dëmshme për veten, dhe duke i lëshuar pe Serbisë në të gjitha kërkesat e saj. Ky është kushti, pa të cilin nuk ka liberalizim as në vitet e ardhshme. Kjo është dashuria e madhe e shqiptarëve për BE-së, e cila e dashuron vetveten dhe Serbinë, sepse e ka rehabilituar, pikërisht pasi ka kryer krime fashiste kundër shqiptarëve, myslimanëve të Bosnjës, kroatëve të tjerëve.
Duket shumë cinik ky konstatim, por është kjo Evropa, që ka themeluar një gjykatë raciste, fashiste kundër shqiptarëve, të cilët kërkon t’ i dënojë e t’ i ndëshkojë sepse janë mbrojtur nga gjenocidi, sepse me ndihmën e Amerikës kanë krijuar një Shtet të ri, të cilin dikur gjyshërit e këtyre të sotmëve, ia kishin bërë tapi Serbisë dhe vendeve sllave ortodokse të Ballkanit.
Evropa e di se shqiptarët nuk do të do të kënaqen me kaq, por do të kërkojnë edhe atë që u takon si e drejtë e natyrshme, e pakonsumuar, e drejtë e patjetërsueshme për të jetuar në një shtet të vetëm, sikur edhe të gjithë popujt e tjerë, mbi baza të së drejtës për Vetëvendosje mbi parimet e njohura historike dhe etnike.
Evropa, është po ajo e kohës së Gjergj Fishtës, dhe tani ka do kërkesa në dukje të tjera, por në esencë të njëjta me ato të kohës së Bizmarkut, i cili kishte thënë: Shqipëria është shprehje gjeografike, ajo nuk ekziston. Formula e Bizmarkut e vitit 1878 sot është reduktuar në ruajtjen e status-quosë. Shqipëria tani ekziston, por jo pjesët e saj. Ato nuk do t’ i bashkohen kurrë Shqipërisë, sepse prishet “Namuzi i Bizmarkut”, prishet konsensusi evropian dhe kjo tërheq me vete efektin domino. Ky efekt nxjerrë në sipërfaqe hartën e arnuar të Ballkanit me lëkurët e shqiptarëve, dhe kjo nuk do të ndodh derisa Evropa ka Berlin, Paris, Romë, Beograd, Athinë, Moskë, Peking etj.
Evropa dhe ne të lakueshmit në mesin e shqiptarëve, përjashtuam Uashingtonin, Londrën e cila i la shëndenë Evropës së mërrytë…
Tani Gjermania sërish me premtimet e saj. Po liberalizim, por duhet pritur, duhet rregulluar Ballkanin e ri me hartat e vjetra të qepura në Paris, në Berlin, në Londër, në Jaltë, në Rambujenë e parë, në Versajë, në Bukuresht e vende të tjera.
Dashuria e shqiptarëve për Evropën nuk ka si të mos na kujtojë dashurinë e madhe të stërgjyshërve tanë për baba Dovletin dhe kur përmendej emri i tij, ata lëviznin nga vendi. Kjo është shqiptaria e bërë dhe e pabërë në të njëjtën kohë. E duam Evropën edhe kur na copëton edhe kur na injoron dhe kur na shpërfillë e na përjashton…
