Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 13 qershor 2025, Kosova dhe Shtetet e Bashkuara të Amerikës pritet të nënshkruajnë një marrëveshje kornizë të rëndësishme në fushën e mbrojtjes, e cila do të zgjatet deri në vitin 2030. Marrëveshja, e paralajmëruar nga kryeministri në detyrë Albin Kurti dhe konfirmuar nga ministri në detyrë i Mbrojtjes, Ejup Maqedonci, synon të forcojë partneritetin strategjik dhe të thellojë bashkëpunimin afatgjatë mes dy vendeve. Sipas Maqedoncit, dokumenti do të përfshijë fusha të rëndësishme si zbatimi i Planit Gjithëpërfshirës të Tranzicionit, rritja e ndërveprueshmërisë mes forcave të sigurisë, zhvillimi i industrisë së mbrojtjes dhe kontributi i përbashkët për paqen dhe sigurinë në rajon dhe më gjerë. Ministri theksoi se kjo marrëveshje nuk ka karakter kërcënues ndaj asnjë shteti, por synon zhvillimin e kapaciteteve mbrojtëse dhe afrimin e Kosovës me strukturat e NATO-s. Ai bëri të ditur se procesi për këtë dokument ka nisur më herët dhe ka marrë miratimin në parim nga Qeveria në mars të këtij viti, për t’u përditësuar më pas në përputhje me zhvillimet strategjike.
