Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një vendim historik për komunitetin shqiptar në SHBA, gjuha shqipe është përfshirë zyrtarisht në listën e gjuhëve të komunikimit nga Departamenti i Arsimit të Qytetit të Nju Jorkut. Lajmi u konfirmua më 18 qershor 2025 nga Kancelarja e Arsimit në Nju Jork, Melissa Aviles-Ramos. Me këtë vendim, të gjitha dokumentet, njoftimet dhe informacionet zyrtare që u dërgohen prindërve nga shkollat publike do të jenë tashmë të disponueshme edhe në gjuhën shqipe. Deri më tani, vetëm 10 gjuhë përdoreshin për komunikime zyrtare, ndërsa me shtimin e tre të rejave – përfshirë shqipen – ky numër shkon në 13. Ky është një hap i madh drejt përfshirjes së plotë të familjeve shqiptare në jetën shkollore të fëmijëve të tyre, duke i lehtësuar ata nga barrierat gjuhësore dhe duke rritur pjesëmarrjen në procesin arsimor. Vendimi ndihmon gjithashtu në forcimin e identitetit kulturor dhe krenarisë kombëtare mes fëmijëve shqiptarë. Kjo arritje vjen paralelisht me një tjetër moment historik: hapjen e klasës së parë dygjuhëshe shqip–anglisht në një shkollë publike të Nju Jorkut, një model që ndihmon në ruajtjen e gjuhës amtare dhe zhvillimin akademik në të dyja gjuhët. Për këtë sukses merita të veçanta i takojnë Këshillit Koordinues të Diasporës, veçanërisht Mark Gjonajt, Drita Gjongecaj dhe Emina Cunmulaj, të cilët përmes lobimit dhe bashkëpunimit të ngushtë me institucionet arsimore kanë bërë të mundur që zëri i komunitetit shqiptar të dëgjohet dhe pranohet në mënyrë institucionale. Ky vendim i rëndësishëm nuk është thjesht simbolik – ai është një strategji për të ardhmen, që forcon gjuhën, kulturën dhe identitetin shqiptar në një nga qytetet më të mëdha dhe më të rëndësishme në botë.
