Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-deputeti i Lëvizjes Vetëvendosje, Fatmir Humolli, në një deklaratë të fundit ka theksuar se partia duhet të respektojë vendimet e Gjykatës Kushtetuese dhe të veprojë me përgjegjësi, duke vendosur interesin e shtetit përpara atij partiak. Humolli vlerëson se Vetëvendosje ka humbur shumë mbështetje nga qytetarët për shkak të politikave që kanë vendosur interesat e partisë përpara interesave të shtetit. Ai thekson se, edhe pse VV ka qenë pjesë e qeverisë, ka mësuar se shteti funksionon pavarësisht ndryshimeve politike dhe lojërave të grupeve që përpiqen të paraqiten si viktima. “Vetëvendosje duhet të kuptojë se shteti ka mekanizma që nuk lejojnë që individët apo partitë politike të sillen me papërgjegjësi të skajshme,” tha Humolli. Ai shtoi se këto “lojëra politike tashmë kanë kaluar në histori.” Ish-deputeti është i bindur se vendimet e Gjykatës Kushtetuese lidhur me zgjedhjen e kryetarit të Kuvendit duhet të respektohen plotësisht, pasi Kushtetuta e Kosovës është hartuar pikërisht për të siguruar stabilitet dhe respektimin e rregullave. “Një vendim i Gjykatës për propozimin e kryetarit të Kuvendit është i pranueshëm, ndërsa çdo përpjekje për të shmangur rregullat është e papranueshme,” tha ai. Humolli paralajmëroi se mosrespektimi i këtij vendimi do të dëmtojë vetëm Vetëvendosjen, ndërsa dëmi për qytetarët tashmë është i dukshëm. “Nëse Vetëvendosje nuk e respekton vendimin e këtij institucioni, do të dëmtojë vetëm vetveten, sepse dëmi për qytetarët tashmë ka ndodhur,” përfundoi ai.
