Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zyra e Rregullatorit për Energji ka njoftuar se bizneset që janë futur në tregun e hapur të energjisë elektrike i plotësojnë të gjitha kriteret ligjore për të zgjedhur vetë furnizuesin e tyre. Në një komunikatë për media, ZRRE thekson se në tregun e hapur janë të licencuara 23 kompani për furnizim me energji, prej të cilave 7 janë aktualisht aktive dhe kanë lidhur kontrata me konsumatorët. Sipas të dhënave zyrtare, nga gjithsej 9,963 pika matëse të ndërmarrjeve, 92% janë tashmë me kontrata komerciale, ndërsa rreth 8% vazhdojnë të jenë pa furnizues. ZRRE rikujton se që nga 1 qershori 2025, këto biznese kanë pasur mundësi të zgjedhin furnizuesin e tyre, ndërsa për ata që nuk kanë nënshkruar ende kontratë, KEK është caktuar si Furnizues i Mundësisë së Fundit për një periudhë 60-ditore. Rregullatori bën thirrje që të gjitha ndërmarrjet të lidhin kontrata sa më parë, pasi në mungesë të një marrëveshjeje me furnizues të licencuar, operatori është i detyruar të ndërpresë furnizimin me energji. ZRRE garanton se do të vazhdojë të mbikëqyrë procesin e liberalizimit në përputhje me ligjin dhe standardet evropiane.
