Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Oda Ekonomike e Kosovës, shpreh shqetësim të thellë lidhur me protestat e kompanive transportuese në shtetet e rajonit, të cilat po shkaktojnë ndërprerje serioze në funksionimin normal të bizneseve kosovare dhe në rrjedhën e tregtisë ndërkombëtare. Këto zhvillime kanë ndaluar eksportin dhe importin e mallrave drejt dhe nga vendet e Bashkimit Evropian, duke krijuar vonesa të konsiderueshme, kosto shtesë për kompanitë dhe rrezik real për ndërprerjen e zinxhirëve të furnizimit. Kryetari i OEK-së, Lulzim Rafuna, që njëkohësisht udhëheq Bordit të WB6 CIF, ka kërkuar vazhdimisht zgjidhje sistemike nga institucionet e Bashkimit Evropian, duke nënvizuar rëndësinë e funksionimit të lirë të tregtisë dhe të stabilitetit ekonomik rajonal. OEK i bën thirrje BE-së për ndërhyrje urgjente institucionale për të siguruar funksionimin normal të transportit ndërkombëtar rrugor deri në gjetjen e një zgjidhjeje të qëndrueshme. Sipas Odës, një qasje e tillë është jetike për ekonomitë e Ballkanit Perëndimor dhe Bashkimit Evropian, duke garantuar integrim tregtar dhe zhvillim të qëndrueshëm rajonal. OEK mbetet e angazhuar për të mbrojtur interesat e komunitetit të biznesit dhe për të kontribuar në dialogun institucional me partnerët evropianë, në funksion të një tregtie të lirë, të sigurt dhe funksionale.
