Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i AAK-së, Besnik Tahiri, ka kritikuar Qeverinë e Kosovës për, siç thotë ai, veprime që bien ndesh me parimet e ligjshmërisë dhe administratës profesionale në vend. Në një reagim publik, Tahiri ka ngritur shqetësime lidhur me shpalljen e konkurseve për pozita të larta drejtuese nga një qeveri në dorëheqje, duke vlerësuar se një ekzekutiv me mandat të kufizuar nuk duhet të ndërmarrë veprime me ndikim afatgjatë në institucionet shtetërore. Ai ka theksuar se një praktikë e tillë, sipas tij, krijon dyshime për ndikim politik në administratë para formimit të qeverisë së re dhe bie ndesh me frymën e ligjit për Qeverinë. Tahiri gjithashtu ka ngritur shqetësime për, siç u shpreh ai, dobësimin e garancive juridike në shërbimin civil, duke kritikuar shndërrimin e disa pozitave drejtuese në mandate të kufizuara dhe rritjen e përdorimit të ushtruesve të detyrës në institucione. Sipas tij, këto praktika rrezikojnë profesionalizmin dhe pavarësinë e administratës publike, si dhe mund të çojnë drejt politizimit të saj. Pavarësisht kritikave, ai ka shprehur mirënjohje për nëpunësit publikë që, sipas tij, vazhdojnë të punojnë me integritet dhe përkushtim në shërbim të qytetarëve dhe shtetit të Kosovës.
