Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Një ditë pas aktgjykimit dënues të Hagës, ish-presidenti Hashim Thaçi, përmes avokatit të tij Luka Mishetiç, ka falënderuar qytetarët e Kosovës dhe mbështetësit ndërkombëtarë për përkrahjen ndaj tij dhe tre ish-krerëve të tjerë të UÇK-së. Në një deklaratë të publikuar në rrjetin social X, Mishetiç u ka bërë thirrje qytetarëve të Kosovës që të qëndrojnë të qetë, duke e cilësuar aktgjykimin e së mërkurës si të padrejtë. Ai ka bërë të ditur se Mbrojtja do ta apelojë vendimin pranë Panelit të Apelit të Dhomave të Specializuara të Kosovës, duke pretenduar se gjatë procesit gjyqësor janë bërë shkelje të rëndësishme ligjore dhe faktike. Avokati ka ngritur shqetësime lidhur me paanshmërinë e Panelit të Gjykimit, duke pretenduar se ndërhyrjet dhe pyetjet e gjyqtarëve kanë kaluar kufijtë e kërkimit neutral të së vërtetës. Sipas Mbrojtjes, këto shqetësime reflektohen edhe në aktgjykimin e shpallur. Mishetiç ka kundërshtuar gjithashtu bazën provuese të gjetjeve për fajësinë e Thaçit përtej dyshimit të arsyeshëm. Ai ka përmendur rastin e Behajdin Allaqit, duke pretenduar se Paneli i Gjykimit ka shpallur publikisht përgjegjësinë e Thaçit për këtë vrasje, ndërsa provat përkatëse janë mbajtur konfidenciale. Thaçi, sipas deklaratës së avokatit, mohon shprehimisht çdo përfshirje në vrasje. Mbrojtja ka paralajmëruar se do të kundërshtojë edhe shkeljet e pretenduara të së drejtës për një gjykim të drejtë, të garantuar nga Konventa Evropiane për të Drejtat e Njeriut dhe Kushtetuta e Kosovës.
