Ahmet Qeriqi: Aeroplanë bombardues të NATO-s, kanë sulmuar njësitë e motorizuara serbe në lëvizje (E shtunë 10 prill, 1999)

Ahmet Qeriqi: Aeroplanë bombardues të NATO-s, kanë sulmuar njësitë e motorizuara serbe në lëvizje (E shtunë 10 prill, 1999)

Herët në mëngjes jemi larguar nga selia në Berishë. Shtëpia është identifikuar dhe shihet mjaft mirë nga pozicionet serbe. Ata do të godasin derisa ta shohin se e kanë shembur. Kemi shkuar drejt Zabelit me xhip dhe atje jemi vendosur në rrugën, për në Pallanik. Matrini ka shkuar në selinë e Agjencisë për të marrë vetë informacione, ndërsa unë dhe Neziri kemi përcjellë zhvillimet në terren, përmes tranzistorëve.

Për emisionin e sotëm përveç lajmeve kemi përgatitur një shënim dhe një koment.

Bëhet e ditur se aeroplanët e NATO-s në Drenicën Qendrore kanë goditur një njësit të motorizuar serb. Ka gjasa që NATO-ja t`i intensifikojë bombardimet edhe gjatë ditës, meqë deri tani ajo ka sulmuar vetëm gjatë natës dhe kryesisht në objekte ushtarake ekonomike dhe shtetërore.

Sot janë zhvilluar luftime edhe në hyrje të fshatin, Luzhnicë. Rreziku kryesor për të depërtuar serbët në këto anë ekziston pikërisht nga drejtimi i Qafës së Duhles, që është njëra ndër pikat më të forta dhe më strategjike të ushtrisë okupatore serbe.

Programin e kemi përgatitur dhe e kemi transmetuar me kohë. Martini  ka sjellë disa informata të cilat i ka marrë në agjencinë Kosovapres. Nusreti të gjitha materialet i ka lexuar drejtpërdrejt nga  studioja e bunkerit.

Në orët e mbrëmjes kemi hetuar lëvizje të forcave të motorizuara armike nga Malisheva  dhe Kieva në drejtim të Grykës së Llapushnikut. Me rastin e fillimit të bombardimit të aeroplanëve të NATO-së kundër njësive në lëvizje, forcat serbe kanë filluar t`i ndërrojnë pozicionet për shkaqe taktike.

Në mbrëmje si zakonisht kemi shkuar në shtëpinë e Rizës. Në podrum kemi ngrënë bukë dhe sapo kishin filluar të shtriheshin dhe të pushonim, meqë  gjatë tërë ditës kemi qenë në lëvizje, papritmas u dëgjuar dy shpërthime tejet të fuqishme krejt afër selisë. Jemi ngritur me shpejtësi dhe përnjëherë jemi larguar në drejtim të zabelit. Pas pak janë dëgjuar edhe shpërthime të tjera të predhave të minahedhësve të armikut, të cilët e kanë vënë në shënjestër selinë. Nga detonimi i fuqishëm janë thyer xhamat e dritareve.

Kemi qëndruar afër dy orë në zabel.

Pasi ka pushuar granatimi jemi kthyer në bodrum. Bëhet me dije se serbët kanë granatuar në pozicionet e luftëtarëve tanë në Arllat,në lagjen e xhamisë, të Bytyçët, të Tërpezë dhe në Fshat të Ri. Forca armike po vepron në mënyrë taktike. Sapo të konsiderojë se forcat tona janë të lodhura apo pa municion, ata do të mundohen me çdo kusht të depërtojnë në Rrafshnaltë.

Ditë më parë kryevrastari çetnik Sheshel, është zotuar se së shpejti do të pijë kafe në malet e Berishës, ndërsa gjenerali Ojdaniq ka premtuar se në këtë male do të ngrihet një fushë e madhe e futbollit…

Gjatë orëve të natës, forcat e Aleancës ushtarake Veriatlantike kanë sulmuar shumë pozicione ushtarake dhe ekonomike të Serbisë.

Kontrolloni gjithashtu

Nga burime të ndryshme të lajmeve bëhet e ditur se sulmet e NATO-s kanë vazhduar me intensitet gjatë 24 orëve të kaluara. Ata kanë goditur shumë caqe ushtarake dhe strategjike të armikut. Zëdhënësi i NATO-s, Xhejmi Shia ka publikuar një shifër të fluturimeve dhe të goditjeve mesatare që aeroplanët e NATO-s ndërmarrin gjatë 24 orëve. Sipas këtyre burimeve bëhet e ditur se mesatarisht për 24 orë realizohen 648 fluturime ndërsa prej tyre godasin në caqe të caktuara 245. Janë shifra tejet impozante, edhe pse ne kemi mundësi t`i përcjellim vetëm dhjetëra prej këtyre goditjeve. Sot papritmas ka ardhur, komandanti i Zonës Operative të Drenicës, Sami Lushtaku me dy ushtarë të tij. Nuk jemi parë prej nëntorit të vitit të kaluar. Samiu edhe pse është i ri dhe tërë energji, megjithatë duket i lodhur nga lufta, por edhe i nevrikosur tejmase. Pas një qëndrimi të shkurtër në tendë kemi dalë në zabel për të biseduar lidhur me problemet me të cilat po ballafaqohet sidomos Sylë Qeriqi dhe Elez Durmishi. Samiu më rrëfen se dje ka biseduar gjerë e gjatë me Sylë Qeriqin dhe Elez Durmishin. Ai më tregon se i ka ndërmarrë të gjitha masat dhe ka kërkuar nga Shefi i Shtabit, Agim Çeku që Brigada 121 të ndahet nga Zona e Pashtrikut dhe të inkuadrohet në Zonën Operative të Drenicës. Vetëm në këtë mënyrë mendon ai, mund të shafitet presioni që po bëhet kundër Sylës dhe Elezit. Meqë Samiu nuk mund të qëndrojë në këto anë, nuk mund as të ushtrojë ndonjë ndikim. Samiu më shpjegon se ka biseduar me Sylejman Selimin dhe me të tjerët, të cilët do t`i kenë parasysh disa veprime të pamatura që kanë shkaktuar huti dhe përçarje të pariparueshme. Ndahemi me Samiun me shpresë se tani e tutje mund të marrin frymë më lirisht. Rreth orës 16.oo jam nisur në drejtim të Krojmirit. Në Divjakë kam takuar Naim Imerin dhe Vehbi Zeqirin të cilët po ktheheshin me një traktor me rimorkio në drejtim të Grykës së Shalës. Më ftojnë që të hip në rimorkio, por meqë rruga është tërë gropa, më mirë udhëtoj këmbë, si gjithnjë. Në mbrëmje kam arritur në kompleksi e të zhvendosurve në fushën e Lezhës. Atje tanimë nuk ka vend as edhe për kalim këmbë. Edhe rrugët janë kufizuar. Dendësia e popullatës është e papërshkrueshme. Si duket në Lezhë kanë depërtuar edhe banorët e Ngucatit, të Bllacës, të Banjes, Lladrovcit e të Bellanicës. Kanë ardhur këtu të gjithë ata që nuk kanë dashur ta lëshojnë vendin dhe të ikin në Shqipëri. Dhe, mirë kanë bërë. Përndryshe as lufta nuk do të kishte kuptim. Popullata që është vendosur këtu ka ujë të mjaftueshëm dhe natyrë të pastër malore. Dy komponente të domosdoshme për jetë. Në Grykën e Krojmirit depërtojnë edhe qindra matrapazë dhe tregtarë. Ata, çmimet e artikujve të tyre i shesin pesë dhe dhjetëfish më shtrenjtë, por ka mjaft të tillë që i blejnë. Një pako cigare shitet 20 marka gjermane. Një kilogram qaj 30 marka. Pesë kilogramë sheqer 20 marka. Mielli nuk ka çmim të lartë, sepse këtë nuk e lejojnë komandantët e luftës. Të gjithë këta artikuj tregtarët i tërheqin nga Shtimja, Lipjani, Ferizaj e qendra të tjera. Depërtimi i mallit bëhet natën nëpër korridorin të cilin e ruajnë ushtarët tanë në relacion Pjetërshticë, Zborc, Godanc. Edhe pse luftë, edhe pse ndodhemi buzë shfarosjes tregtia dhe matrapazllëku nuk ndalen. Edhe këto të liga po i provon mbi kurriz ky popull fatmjerë. Në mbrëmje më lajmërojnë se gjatë luftimeve në vendin e quajtur, Gurinat në Blinajë, ka rënë dëshmor, Halil Nezir Metaj, nga Lagja Metaj e Krojmirit, njëri ndër luftëtarët e radhëve të para. Luftime janë zhvilluar deri në terr, meqë ushtarët tanë kanë bërë përpjekje për ta marrë trupin e dëshmorit. Burimet serbe bëjnë të ditur se aeroplanët e NATO-s kanë goditur Burgun e Dubravës, ku si duket kanë pësuar qindra të burgosur shqiptarë. Nuk kemi të dhëna se a kanë goditur forcat e NATO-s, apo serbët kanë kryer ndonjë masakër të çmeritur Si do qoftë duket sikur shumë shqiptarë kanë pësuar fatalisht. Në tendën e familjes sime në Krojmir i kam takuar të gjithë. Zymrytja më bën me dije se nëna ka ardhur ka ardhur nga Shtimja dhe ndodhet te Hasani. Labja dhe Rrezja kanë depërtuar në fshat për ta mjelë lopën. Atje zakonisht po rri gjatë ditës edhe xha Mehdiu dhe tezja Ajshe. Lëvizjet bëhen nën breshërinë e granatave të armikut, të cilët kanë depërtuar në shumë pika të Blinajës. Në mbrëmje ka ardhur për të biseduar Selatin Rizani djali i Ramadanit, profesor i edukatës fizike, tani epror i UÇK-së në pikën e maleve të Caralevës…

Ahmet Qeriqi: Gjatë 24 orëve, aeroplanët e NATO-s mesatarisht bëjnë 640 fluturime ndërsa nga këto, 245 goditje në caqet serbe. Në Berishë vjen Sami Lushtaku. (E shtunë 22 maj, 1999)

Nga burime të ndryshme të lajmeve  bëhet e ditur se sulmet e NATO-s kanë vazhduar …