Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gazetari investigativ kroat Domagoj Margetiq ka publikuar një dokument të datës 17 shkurt 1995, për të cilin pretendon se është pjesë e dokumentacionit sekret të Shërbimit të Sigurimit Shtetëror të Bosnjë-Hercegovinës dhe se lidhet me aktivitetet e ashtuquajtura “Sarajevo Safari”. Dokumenti, i atribuar Nedzhad Ugljenit, atëherë drejtues i shërbimit të sigurimit, përmend një përpunim operacional me emrin e koduar “Lovac” (“Gjuetari”). Sipas materialit të publikuar nga Margetiq, në të Aleksandar Vuçiq, i cili në atë periudhë ishte sekretar i përgjithshëm i Partisë Radikale Serbe, përmendet si person që koordinonte ardhjen e shtetasve të huaj në pozicione snajperësh në Grbavicë dhe te Varrezat Hebraike. Në dokument pretendohet gjithashtu se këta persona të huaj dërgoheshin në pozicione nga të cilat qëllohej ndaj civilëve në Sarajevë. Sipas materialit, informacionet ishin mbledhur nga kontakte operative dhe konsideroheshin të besueshme nga shërbimi. Dokumenti përmend edhe lëvizjet e Vuçiqit drejt territorit të kontrolluar nga forcat serbe të Bosnjë-Hercegovinës. Sipas tij, në pikat e kontrollit ai identifikohej me një legjitimacion të rezervistit të shërbimit sekret serb, për të cilin pretendohet se ishte lëshuar nga Frenki Simatoviq. Margetiq pretendon se Ugljeni kishte vazhduar mbledhjen dhe dokumentimin e informacioneve edhe përkundër një ndalimi zyrtar për hetime. Sipas tij, pas vrasjes së Ugljenit në vitin 1996, dokumentacioni i tij u urdhërua të shkatërrohej, ndërsa një pjesë e materialeve ishte zhdukur. Megjithatë, gazetari kroat pretendon se Ugljeni kishte ruajtur kopje të dokumenteve në vende të ndryshme, duke mundësuar që një pjesë e tyre të dilte më vonë në publik. /lajmi.net/
