Fillimi / Botimet / Në ambientet e Shtëpisë së Kulturës, “Tahir Sinani” në Malishevë u hap ekspozita “Rruga e lirisë” dhe panairi “Dekada e Librit të Lirisë II”

Në ambientet e Shtëpisë së Kulturës, “Tahir Sinani” në Malishevë u hap ekspozita “Rruga e lirisë” dhe panairi “Dekada e Librit të Lirisë II”

 Sot në ambientet e Shtëpisë së Kulturës “Tahir Sinani” në Malishevë u hap ekspozita “Rruga e lirisë” dhe panairi “Dekada e Librit të Lirisë II”. Në hapjen e kësaj ekspozite morën pjesë, kryetari i komunës së Malishevës, Isni Kilaj, , drejtori për kulturë, MevludinMazreku, drejtori i Shtëpisë së Kulturës, Enver Mazreku, drejtori i Radios Kosova e Lirë, Ahmet Qeriqi, pastaj redaktori i Radios gjatë luftës, Nezir Myrtaj, drejtori i Radio Malishevës dhe gazetari i luftës, Habib Zogaj, Valdet Hoti, Rizah Berisha e shumë veprimtarë të tjerë. Në fjalën përshëndetëse para shumë të pranishmëve, nxënës, arsimtarë, profesorë e zyrtarë të Komunës, kryetari Isni Kilaj foli për kontributin që ka dhënë kjo Radio gjatë luftës, ndërsa përshëndeti stafin e Radios me rastin e hapjes së ekspozitës, e cila u përcoll me interesin nga artdashësit e Malishevës me rrethinë.

Në fjalën e  hapjes drejtori i Radios-Kosova e Lirë, Ahmet Qeriqi tha se ekspozita me foto të luftës e Radios-Kosova e Lirë dhe Panairi, “Dekada e Librit të lirisë”, i shtojnë një aktivitet më tepër Malishevës me rrethinë në manifestimet e shumta në shënim të 100-vjetorit të  Pavarësisë së Shqipërisë. Radio-Kosova e Lirë dhe Agjencia Kosovapress gjatë kohës së luftës së UÇK-së kanë transmetuar program dhe kanë shpërndarë informata kryesisht nga rajoni i Llapushës  dhe i Drenicës.

Në fjalën time të hapjes ju njoftoj se fotot që janë ekspozuar sot, këtu, janë filmuar ekskluzivisht nga fotoreporterët dhe gazetarët e  Radios Kosova e Lirë dhe Agjencisë Kosovapress, me përjashtime të rralla. Këto foto janë përzgjedhur me këtë rast nga fondi prej afër 1200 fotove sa kanë arritur t’ i fotografojnë dhe t’ i ruajnë fotoreporterët e gazetarët e Radios:Martin Çuni, Habib Zogaj, Nusret Pllana, Valdet Hoti, Gazmend Elshani, Besnik Berisha e të tjerë.

Sa i përket Panairit “Dekada e librit të lirisë” do t’ iu njoftoj se kemi prezantuar për ju dhe adhuruesit e librit të kësaj treve 14 vëllimet e monografisë, “Feniksët e lirisë” si dhe shumicën e botimeve të Radios-Kosova e Lirë. Shpresojmë që këto aktivitete kulturore do të na rikthejnë në kujtesë,  kohën  e mbijetesës, kohën e kthesave të mëdha historike të luftës së Ushtrisë Çlirimtare të Kosovës, e cila udhëhoqi me sukses luftën e drejtë dhe të natyrshme për liri e pavarësi dhe e cila në luftën e saj kundër shtypjes brutale e barbare të regjimit të Milosheviqit mori edhe përkrahjen e ndihmën e fuqisë më të madhe ushtarake të botës, Aleancës Veriatlantike dhe të forcave demokratike e përparimtare të rruzullit.

Uroj që kjo ekspozitë të vizitohet dhe të përjetohet si mesazh i një kohe heroike, i kohës kur morëm guximin dhe shpërndamë në eter kumtimin  paralajmëruese të fitores me fjalët kuptimplote: “Ju flet Kosova e Lirë” tha mes tjerash profesor Qeriqi.

Ekspozita qëndron e hapur deri më 24 nëntor.

Kontrolloni gjithashtu

Shefqet DIBRANI: PREJ MISTICIZMI DERI NË REALITET

Shefqet DIBRANI: PREJ MISTICIZMI DERI NË REALITET

(Mario Bellizzi, “WHO ARE WE NOW?“, poezi, botoi NGBL „DUKAGJINI“, Pejë 1997, faqe 152. Në shqipen e ...