Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Fushata e portalit Ekspress dhe e disa papagallëve të vetëquajtur analistë, kundër Erzen Vraniqit, për faktin se ai është djali i Hamdi Vraniqit, i cili i paska dhënë leje ndërtimi Kishës serbe në Prishtinë, nxjerrë në sipërfaqe atë thënien: “Ma mbaj djalin, t’ i them sa nuk më ka thënë!”. Po të kishte dashur, Erzen Vraniqi të bashkëpunonte me UNMIK-un, të EULEX-in, do të kishte një post të lartë kudo në Qeveri, apo në Presidencë, të paktën do të ishte këshilltar i ndonjërit prej tre krerëve të lartë të vendit. Por ai ka zgjedhur Vetëvendosjen e cila ka projekt çlirimin dhe bashkimin e shqiptarëve…
Askund në botën e qytetëruar nuk ndodh, që djali të ndëshkohet për veprat e pamira të babait, përveç në rastet kur ai, me vepër dhe bindje mbështet babanë dhe nuk pranon të diferencohet prej veprave të tij, nëse ato vepra konsiderohet se i kanë bërë dëm kombit. Nëse dikush bën përpjekje ta demonizojë, Erzen Vraniqin, për nënshkrimin e një leje ndërtimi, nga babai i tij në kohën e regjimit të Milosheviqit, atëherë çka duhet të ndodh me Shkëlzen Maliqin, djalin e kriminelit të luftës, UDB-ashit të damkosur, Mehmet Maliqi, i cili ka pushkatuar nacionalistë shqiptarë pa gjyq e me gjyq, ndërsa në vitin 1981 ka nënshkruar masën e izolimit për dhjetëra mijëra intelektualë të Kosovës, për të cilët dyshohej se e kishin mbështetur kërkesën gjithë-popullore “Kosova Republikë”. Për ato vepra antikombëtare dhe antinjerëzore të babait, djali i kriminelit dhe vrastarit, Shkëlzeni, mbase për besnikëri jetësore ndaj Jugosllavisë është përzgjedhur këshilltar i kryeministrit, Edi Rama, për Serbinë. Ai po ia i mbanë lidhjet perfekte me Beogradin dhe ia përkthen veprat me qëllim që ato të përurohen në Beograd, për sikur thuhet relaksimin e marrëdhënieve Shqipëri-Serbi, edhe pse në Sodomën Serbi ende ndodhen eshtrat e më shumë se 1700 shqiptarëve të zhdukur gjatë luftës, për të cilët Beogradi nuk dëshiron të flasë me Edi Ramën, edhe pse Serbia ka vrarë në mënyrë sistematike, institucionale qindra e mijëra shqiptarë, kroatë e myslimanë të Bosnjës, Hercegovinës e të Sanxhakut.
Djali i inspektorit të UDB-së, Enver Maxhuni, kryepolici i Kosovës, Shpend Maxhuni është përzgjedhur sërish për këtë post nga Hashim Thaçi dhe Isa Mustafa, edhe pse është përfolur për afera ndër më skandalozet. Përse postohet në krye të policisë së Kosovës, madje edhe për një mandat tjetër, Shpend Maxhuni, djali i babait që ka rrahur e keqtrajtuar mizorisht, madje edhe vajza të mitura shqiptare, në vitin 1981?
Sot në Kosovë ka mijëra bijë dhe bija të ish-milicëve dhe ish inspektorëve të UDB-së, të ish prokurorëve të Jugosllavisë dhe tani prokurorë të përzgjedhur të EULEX-it. Ka qindra bij e bija gjyqtarësh, porotësh, dëshmitarësh, denoncuesish, baballarët e të cilëve, gjatë regjimeve okupatore, duke qenë besnikë të atyre regjimeve kanë dënuar e ndëshkuar mizorisht shqiptarët liridashës të vendit.
Po Berat Buzhala i Ekspresit, i “Komitetit”, biri i kujt është?
Po Veton Surroi e Flaka Surroit të kujt janë?
Po Bato Haxhiu kë kishte baba?
Po bijtë e Xhavit Nimanit, Fadil Hoxhës, Xhevdet Hamzës, Ali Shukriut, Azem Vllasit, Ibush Kllokoqit, Lutfi Ajazit, Selim Broshës, Jakup Hotit, Mehmet Shoshit, Sinan Hasanit, Ismail Arifajt dhe qindra të tillëve ku janë dhe a i kanë kërkuar ndonjëherë falje familjeve të viktimizuara shqiptare, nga baballarët e tyre? Ku janë ata dhe përse të paktën asnjëri prej tyre nuk ka kërkuar falje për veprat kriminale të baballarëve të tyre, për vrasjen e dhjetëra mijëra shqiptarëve prej vitit 1945 e deri në qershor të vitit 1999?
Jo po, nuk duhet harruar faktet, sepse mallkohemi nga gjaku i derdhur rrëke për liri.
Demonizohet djali i një babai, që paska nënshkruar një leje ndërtimi në kohën kur Kosova ishte e okupuar dhe regjimi në Beograd kishte suspenduar edhe autonominë dhe kishte nxjerrë jashtë ligjit të gjithë shqiptarët. Po të kishte dashur, Erzen Vraniqi të rreshtohet bashkë me argatët e UNMIK-ut, të EULEX-it, do të kishte një post të lartë kudo në Qeveri, apo në Presidencë, të paktën do të ishte këshilltar i ndonjërit prej tre krerëve të lartë të vendit. Por ai ka zgjedhur Vetëvendosjen e cila ka projekt çlirimin dhe bashkimin e shqiptarëve.
Nëse duhet të hidhen në shtyllën e turpit bashkëpunëtorët e mercenarët e serbëve të Titos, Rankoviqit e Milosheviqit, atëherë duhet nisur nga fillimi dhe duhet vajtur deri në fund, por jo në mënyrë selektive sipas fushatave të krerëve politikë, e kurrsesi jo bijtë e bijat e atyre që nuk janë pajtuar me veprat e baballarëve të tyre dhe që mjerisht janë fare pak në numër.
