Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Fushata, të cilën gati si çdoherë e fillojnë jugo-mediet dhe portalet që i financon Serbia, kësaj radhe gjoja në emër të mbrojtjes së një të miture nga Drenasi, zbuluan edhe një herë se farkuesit e fushatave të tilla, “kërkojnë shesh për të bërë përshesh”. Nuk justifikohet me asgjë dhuna që ka ndodhur kundër së miturës në Drenas, edhe pse ky rast, nuk është sikur thuhet i izoluar, por vetëm i nxjerrë në sipërfaqe, sepse raste të tilla mjerisht, në këtë epokën tonë “të artë” të demokracisë kapitaliste ka shumë e më shumë, por ato vetëm në situata të caktuara i nxjerrin në sipërfaqe, kujdestarët e politikave të klaneve të caktuara.
Rastet si ky i fundit, në Drenas, ka një histori të fshehjes së krimit si nga viktima, familja e saj por edhe një rreth më i gjerë i implikuar në këtë faqe të zezë.
Ky është rast i freskët për t’ u bindur edhe njëherë se sa helm mund të vjellin gazetarët e instruktuar, që luajnë rolin e inspektorëve e hetueseve, që blejnë e shesin informata, në një shoqëri të brishtë, ku gazetari, sipas ligjeve në fuqi mund të fyejë, mund ta etiketojë individin e caktuar, mund ta deformojë informatën, mund ta ndërsejë një pjesë të opinionit që nuk mendon me kokën e vet, dhe nuk i jep askujt llogari, as përgjegjësi.
Kjo garë e rrezikshme e këtyre “jurishnikëve” të demokracisë, ka prapa segmente të caktuara të shërbimeve të huaja, të cilat i paguajnë shumë shtrenjtë informatat për shkatërrimin e imazhit të Kosovës, sikur ato për etiketimin e vendit si tokë e pëlleshme e ISIS-it, apo si tokë e muxhahidëve, otomanëve, e të tjera.
Rasti i fundit, në Drenas, ka për qëllim që Drenicën e viktimizuar nga Serbia, ku ende janë të pashëruara plagët e luftës ta paraqesin si trevë të krimit e të prostitucionit, vetëm pse konsiderohet se është bastion i PDK-së dhe i “krahut të luftës”.
Kjo fushatë ku për shkak të një polici pervers, etiketohet krejt policia e Drenasit, për shkak të një mësuesi të pamoralshëm, etiketohen të gjithë mësimdhënësit, për shkak të një mjeku në detyrë, etiketohen të gjithë mjekët, madje një deputet në Kuvend bën përgjithësime të tilla të papërgjegjshme kur deklaron se “Kosova është një shtet që i dhunon vajzat e gratë”, këto etiketa kanë qëllime të errëta me prapaskena të rrezikshme, të cilat arrijnë efektet e dëshiruara, për ata që ditë e natë i kurdisin Kosovës kurthe të tilla.
Lajmi për dhunimin shumëfish të viktimës u gjend edhe në mediet e huaja, të cilat e dënojnë rastin dhe paragjykojnë Kosovën si vend të krimit e prostitucionit legal. Madje ato për një çast mbulojnë dhunën morbide e barbare qindfish më të shprehur në vendet e tyre.
Dhe kush janë këta shqipfolës që ndërmarrin fushata të tilla, këta kujdestarë të afishimit të krimeve, të cilët shajnë atdheun, etiketojnë luftën e UÇK-së, përdhosin moralin e kombit kërkojmë heqjen e shtatores së Skënderbeut nga Sheshi në Prishtinë dhe veprojnë krejt lirshëm ashtu si vepronin në të kaluarën inspektorët e UDB-së në vendin tonë dhe sikur veprojnë edhe sot në shumë medie e portale, të cilat edhe i financojnë.
Përpjekja jo e pasuksesshme mediale për ta paragjykuar Drenicën si vend të krimit e të prostitucionit, ka një qëllim të caktuar dhe akordon me fillimin e veprimeve të Gjykatës Speciale inkuizicionale kundër UÇK-së.
Kjo përpjekje po jep rezultate dhe këto rezultate jo vetëm që dëmtojnë imazhin e lirisë dhe të pavarësisë, por shkojnë edhe më larg, me qëllim për ta devalvuar çdo vlerë të shenjtë kombëtare, sepse vetëm truri i tillë i shpërlarë e këtyre gazetarëve është i denjë për Evropën e “civilizuar”, të cilës i shërbejnë vullnetarisht, natyrisht duke thithur edhe burimet shumë të majme “të mijëvjeçarëve”.
Gazetari, Baton Haxhiu, përkulet para këmbëve të një Liljanës, në Beograd, duke i thënë se dashuria e tij dhe e saj, për një të ardhme të bashkuar e të vëllazëruar serbe-kosovare kalon mbi çdo luftë çlirimtare dhe mbi çdo krim që ka kryer Serbia në Kosovë, kështu shkruan këshilltari numër një i Hashim Thaçit, Edi Ramës, dikur dhe tani edhe “savetnik” i Stanishiqit, ndërsa kapitalisti medial, Veton Surroi ka thënë dhe e thotë hapur se 200,000 votuesit e PDK-së e të Thaçit janë kriminelë, sepse e mbështesin atë si “të inkriminuar”, apo UÇK-ja ka qenë organizatë fashiste e terroriste.
Truthari i gazetarisë perverse, Parim Olluri shkruan se po të ishte gjallë Adem Jashari do të bëhej njeriu më i korruptuar në Kosovë. Pastaj një Arben Idrizi i portalit ekspress, akuzon legjendarin, Adem Jashari se me veprimet e tij paska vrarë krejt familjen, sepse, sipas tij ai pa hezitim do të duhej të ishte dorëzuar te serbët. Gazetari kontravers qe herë pështyn herë lëpin, Berat Buzhala thotë se UÇK-ja nuk ka bërë lufte kundër Serbisë por ka rrahur e ka vrarë civilë shqiptarë, ndërsa gazetari, tani këshilltari më i përdredhur i kryeministrit, Haradinaj, kosovari i thekur, Halil Matoshi kërkon të hiqet shtatorja e Skënderbeut nga Sheshi i kryeqytetit të Kosovës, sepse ai ka qenë shqiptar e jo kosovar. Kjo fundërrinë e gazetarisë vazhdon ta rrënojnë imazhin e Kosovës së pavarur e sidomos atë të luftës së UÇK-së, sepse me këto veprime vkelin favore të shumëfishta për veten e tyre dhe mediet që i drejtojnë ata.
Fushata, gjoja në mbështetje të viktimës nga Drenasi po merr kahe të rrezikshme politike ku mbi kurrizin e një të miture, familjes dhe rrethit të saj, po derdhet mllefi partiak dhe përpjekja për të fituar vota e favore të caktuara.
Për degjenerimin e rinisë në Kosovë përgjegjëse është politika dhe segmente të caktuara të saj, e cila nxjerrë favore nga ky fenomen, sepse duke e degjeneruar rininë përfitojnë bosët e shpërndarjes së drogës, bosët e prostitucionit, të trafiqeve, përfiton tërë aparati shtetëror, sepse sa më shumë krime të ndodhin shteti merr masa, jo me qëllim të parandalimit, (këtë nuk e ka për detyrë, madje as me Kushtetutën e Ahtisarit), por me qëllim të zgjerimit dhe forcimit të radhëve, krijon task forca, mbush gjyqet me lëndë penale, pastaj punojnë policët, gjurmojnë nëpër qymeze AKI-stët, hapin punë shumë e më shumë prokurorët, gjykatësit, avokatët, punon dhe forcohet tërë administrata shtetëror, u dyfishohen pagat prokurorëve e gjykatësve dhe forcohet e lulëzon shteti kapitalist, duke shfrytëzuar sa më shumë viktimat, dhe duke forcuar burokracinë shtetërore.
Ky është shteti i fuqishëm të cilin po e krijon Kosova duke i lejuar e duke i stimuluar paraprakisht të gjitha llojet e krimeve dhe më pas duke i luftuar ato me sukses, me fushata, me krekosje dhe rrahje gjoksi se Kosova qenka një “storie” suksesi, për faktin se po e qeveriskan politikanët të mençur dhe meritorë të saj.
Jo vetëm në Kosovë, por mjerisht në tërë hapësirën etnike shqiptare, degjenerimi është në kulmin e lulëzimit, sepse familja tradicionale shqiptare dhe ajo e kohës së socializmit nuk është më. Tani është familja moderne e kafeneve e lakuriqësisë dhe perversiteteve, e cila edukohet me televizione perverse, me skena lakuriqe, me tema çoroditëse sikur bëjnë të çoroditurit e disa medieve, që kanë për qëllim degjenerimin dhe shkatërrimin e moralit njerëzor e kombëtar.
