Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Përgjithësisht gjuha e shprehur dhe e shkruar e shumicës së medieve të shkruara e elektronike në gjuhën shqipe nuk përmbush nivelin e duhur të kulturës shoqërore e intelektuale në të shprehur dhe në të shkruar. Kjo gjendje mbase është edhe shprehje e pakënaqësisë së përgjithshme sociale dhe e traumave, që kemi përjetuar dhe po përjetojmë si popull i ndarë në pesë shtete, me një ardhmëri, e cila nuk premton ndonjë rrugëdalje dhe e cila po vazhdon të thellohet me një degradim rapid të vlerave njerëzore e kombëtare. Kjo gjendje kaotike e zhveshjes së vlerave po shprehet sidomos në medie, të cilat atë e përçojnë në çdo familje dhe mjedis shoqëror. Në këtë drejtim, shumica e medieve, dashur pa dashur, ndikojnë në zvetënimin dhe tjetërsimin e moralit publik, tradicional të mirësjelljes, që ka mbijetuar me shekuj ndër shqiptarë.
Fyerja apo sharja e burrit në Kuvend, sipas “Kanunit të Lekë Dukagjinit” ndëshkohej me gjobë shumë të rëndë madje me përzënie të përjetshme nga Kuvendi i burrave”. Sot në Shqipëri, jo më pak se kryetari i Qeverisë, fyen dhe shan më keq se një “pajtonxhi” apo një rrugaç. Dhe nuk është ky i vetmi që përdor një gjuhë të tillë, larg çdo kodeksi moral e njerëzor. Kjo gjendje skandaloze e komunikimit ka helmuar edhe opinionin publik, meqë tashmë është krijuar bindja se në demokraci je i lirë të shprehesh si të duash, kudo të jesh, në Qeveri, në Kuvend, në Presidencë, në rrugë, apo në pijetore. Kjo mënyrë e keqpërdorimit të fjalës së lirë është bërë tashmë model dominues komunikimi kudo, në familje, në rrugë, në shoqëri, në medie dhe në institucione.
Ja vetëm shembulli i sotëm i gjuhës denigruese, pasqyruar në disa medie, lidhur me zhvillimet në Kuvend
Gazeta “Ekspress”, portali “Telegraf”, “Kosova Sot” e disa mediume të tjera të shkruara dhe elektronike, ditë për ditë përdorin një gjuhë të bastarduar, shpeshherë gjuhë rrugaçësh, sidomos kur lajmi apo komenti iu adresohet përfaqësuesve të institucioneve, me qëllim për t’ i denigruar dhe për t’ i fyer sa më shumë. Natyrisht se në këtë mënyrë ata zbulojnë mungesën e moralit dhe kodit të tyre të sjelljes në raport me lexuesit, duke përdorur jo vetëm fjalë banale, fyerje e përçmime, të cilat nuk kanë asgjë të përbashkët me lajmin, por në radhë të parë ata ngutën të shprehin qëndrimin e tyre përbuzës ndaj zyrtarëve të caktuar, sipas bindjeve apo qëndrimeve të tyre politike.
Kjo gjuhë e ndragur kufizohet në slogane si këto të ditës së sotme: “Jakup Krasniqi po përlahet me Adem Grabovcin”, ose “ Jakup Krasniqi rroket , apo kapet me Adem Grabovcin”, shprehje me të cilat ata i kanë stolisur faqet e tyre të gazetave të ditës së sotme ( 4. 10 2012), duke komentuar zhvillimet në Kuvendin e Kosovës. Gazetarët dhe redaktorët e tillë, kurrë nuk skuqen nga turpi, edhe pse ata e dinë përmbajtjen pezhorative të shprehjeve të tilla, por nuk e kanë për pesë para ta shprehin mllefin e tyre me përgojime të ulëta, perverse e të ndragëta. Natyrisht se disave prej këtij “soji” të gazetarëve iu mungon edhe arsimimi i duhur, sepse në raste të tilla fjala e pahijshme mund të kornizohet në thonjëza, me qëllim për t’i bërë me dije lexuesit se po përdoret një fjalë, që nuk i përket natyrës realiste të përshkrimit të gjendjes, por një zëvendësim, me qëllim për ta paraqitur një qëndrim ndryshe, duke u distancuar nga etiketimet e fyerjet.
Këta “gazetarë” të papërgjegjshëm, shpeshherë edhe të neveritshëm me qëndrimet e tyre përbuzëse kundër krerëve të institucioneve, demonstrojnë mungesën e kulturës së shprehjes, qasjen e shëmtuar ndaj informimit dhe arrogancën deri naive në trajtimin e problemeve të ndryshme shoqërore e politike. Këtu nuk kemi të bëjmë me komente apo shkrime kritike, ku akëcili gazetar i lejon vetes të përdor fjalorin, të cilin tekefundit e ka ushqim të vetin shpirtëror dhe “intelektual”, por është fjala për kumtimin e lajmit, për informatën, e cila nuk duron komentime banale e perverse.
Disa medie të tjera, si “Kosovapress”, “Zëri”, “Koha net” duke lajmëruar dhe komentuar zhvillimet gjatë seancës së sotme në Kuvendin e Kosovës u treguan më të matura, duke përdorur sintagma më të kulturuara si: “u ndeshen verbalisht”, “u përplasen mes veti”, “u zunë” e shprehje të tjera, të cilat i akordojnë përshkrimit realist lidhur me zhvillimet politike në Kuvendin e Kosovës.
Gjuha e çoroditur, tregon edhe nivelin e çoroditur të një kategorie njerëzish, qofshin ata zyrtarë, gazetarë, trafikantë apo banditë rrugësh. Gjuha e tillë tregon mungesën e edukatës dhe të kulturës, familjare e shoqërore. Fatkeqësisht, tashmë kemi filluar të bëhemi imunë ndaj kësaj zezone…
