Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i Lëvizjes Vetëvendosje, Rufki Suma, ka propozuar krijimin e një komisioni parlamentar të posaçëm për harmonizimin e emërtimit të vendbanimeve në Kosovë, duke argumentuar se disa prej tyre nuk pasqyrojnë identitetin dhe realitetin historik të vendit. Suma tha se emrat aktualë me prejardhje serbe duhet të rishikohen dhe të zëvendësohen me emërtime që, sipas tij, burojnë nga historia dhe identiteti shqiptar. Ai përmendi disa raste konkrete si Drenas (Glogovac), Skenderaj (Srbica) dhe Ferizaj (Uroševac), duke thënë se përdorimi i emërtimeve paralele apo të trashëguara nga periudha të ndryshme historike nuk është i pranueshëm. “Po flasim për identitetin, dinjitetin dhe të drejtën tonë për ta quajtur vendin tonë me emra që burojnë nga historia dhe realiteti ynë”, ka deklaruar Suma. Ai shtoi se një hap i tillë do të ndihmonte në unifikimin e emërtimeve zyrtare dhe në forcimin e identitetit shtetëror të Kosovës, duke përmendur edhe rastin e mëhershëm të ndryshimit të emrit të Hanit të Elezit. Propozimi i tij pritet të hapë debat në opinionin publik dhe në institucionet vendimmarrëse për mënyrën e standardizimit të emërtimeve gjeografike në vend.
