Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas akuzave të fundit të kryeministrit në detyrë, Albin Kurti, dhe ish-kryeparlamentarit Glauk Konjufca ndaj Gjykatës Kushtetuese, edhe Bashkimi Evropian ka reaguar duke kërkuar që politikanët të përmbahen nga ndërhyrjet në gjyqësor. Zëdhënësi i Zyrës së BE-së në Kosovë, Nikola Gaon, tha se pavarësia e gjyqësorit është parim themelor i sundimit të ligjit, ndërsa roli i Gjykatës Kushtetuese është të interpretojë dhe zbatojë Kushtetutën. Ai i bëri thirrje aktorëve politikë që të shmangin çdo formë presioni apo sulmi personal ndaj gjyqtarëve. Edhe shefi i misionit EULEX, Giovanni Pietro Barbano, në një postim në rrjetin “X” theksoi se sulmet personale ndaj gjyqtarëve dhe prokurorëve janë të papranueshme, duke kujtuar se pavarësia gjyqësore është gurthemel i sundimit të ligjit. Ndaj këtyre sulmeve ka reaguar edhe vetë Gjykata Kushtetuese, e cila i ka cilësuar ato të papranueshme. Reagimet erdhën pasi Kushtetuesja u sulmua publikisht në mbledhjen e Këshillit të Përgjithshëm të Vetëvendosjes.
