Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Beogradi zyrtar ka paralajmëruar një ofensivë të re diplomatike kundër Kosovës në margjinat e sesionit të 80-të të Asamblesë së Përgjithshme të OKB-së që mbahet në New York nga 23 deri më 29 shtator. Ndërkohë, institucionet e Kosovës – as qeveria, as presidenca – nuk kanë bërë të ditur se çfarë veprimesh do të ndërmarrin për t’iu kundërvënë kësaj fushate të Serbisë. Vjosa Osmani, e pranishme në ShBA, është mjaftuar të publikojë në rrjetet sociale takime me komunitetin shqiptar dhe me Sekretarin e Përgjithshëm të Ligës Arabe, Ahmed Aboul Gheit. Ajo theksoi rëndësinë e bashkëpunimit me këtë organizatë dhe nevojën për mbështetje në procesin e njohjeve të reja për Kosovën. Por mungesa e një strategjie konkrete dhe e një aksioni të koordinuar diplomatik në raport me ofensivën e Serbisë ngre pikëpyetje serioze për qasjen e presidencës. Kritikët vlerësojnë se postimet e Osmanit në “Facebook” nuk përbëjnë kundërpeshë ndaj veprimeve të Beogradit, që prej vitesh ka ndërtuar mekanizma të fuqishëm për të penguar njohjet e Kosovës. Në një moment kur Serbia e shton fushatën e saj ndërkombëtare, Kosova rrezikon të shfaqet e papërgatitur dhe pa një zë të fortë diplomatik në arenën globale.
