Jonathan Hargreaves: Zvarritja e ngërçit politik po i kushton Kosovës që të ketë zë të plotë e të besueshëm në arenën ndërkombëtare

Ambasadori britanik në vendin tonë, Jonathan Hargreaves ka tërhequr vërejtjen se zvarritja e ngërçit politik po i kushton Kosovës që të ketë zë të plotë e të besueshëm në arenën ndërkombëtare. Ai ka shtuar më tutje se përgjegjësia për zgjidhje është e përbashkët – ligjore dhe politike dhe ka theksuar më tutje se nëse kjo nuk arrihet, atëherë zgjedhjet e reja mbeten opsion, por me kusht që fillimisht zgjedhjet lokale të zhvillohen mirë dhe rezultatet të respektohen. Gjatë intervistës për Radion Evropa e Lirë, ambasadori, Jonathan Hargreaves ka thënë se të gjitha palët duhet që ta lejojnë Gjykatën Kushtetuese të bëjë punën e saj, të respektojnë pa mëdyshje vendimet e saj dhe të mundësojnë funksionalizimin e Kuvendit, zgjedhjen e qeverisë dhe të presidentit në fillim të pranverës. “Kosovës i duhet patjetër një buxhet i miratuar. I duhet të jetë aktive në skenën ndërkombëtare. Ne kemi punuar me Kosovën për shumë vite, jo vetëm këtu, por edhe në plan ndërkombëtar. Duam ta shohim Kosovën pjesë të më shumë organizatave ndërkombëtare. Duam ta shohim si partnere në sigurinë evropiane. Duam të shohim që Qeveria e Kosovës bën gjëra që kanë vërtet rëndësi për të gjithë njerëzit që jetojnë në Kosovë. Dhe, të gjitha këto janë bllokuar tani. Unë nuk mendoj se kjo është në interesin e Kosovës” ka theksuar ambasadori i Britanisë së Madhe në vendin tonë, Jonathan Hargreaves.