Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deklarimet e analistit serb Dushan Janjiq se në Shtetet e Bashkuara po përgatitet një dokument i ri për dialogun Kosovë–Serbi janë pritur me skepticizëm nga eksperti amerikan i çështjeve të Ballkanit, profesori Daniel Serwer, i cili thotë se nuk sheh sinjale reale për një angazhim të tillë nga administrata aktuale në Uashington. Serwer ka theksuar se pretendime të tilla duhen marrë me rezervë, duke nënvizuar se çdokush mund të hartojë dokumente apo propozime jozyrtare, por kjo nuk do të thotë se ato përfaqësojnë qëndrim apo iniciativë të administratës amerikane. Ai shprehet pesimist për gjallërimin e dialogut në rrethanat aktuale politike në SHBA. Sipas Serwer, prioritetet e Uashingtonit janë zhvendosur dhe Ballkani Perëndimor ndodhet shumë poshtë në agjendë, duke u përmendur vetëm në raste sporadike dhe shpesh për retorikë politike. Ai madje paralajmëron se administrata aktuale duket më e fokusuar në demonstrim fuqie sesa në procese dialogu afatgjata. Nga ana tjetër, Janjiq ka këmbëngulur se burimet e tij nga rrethet e ekspertëve dhe politikës amerikane flasin për një bazë të re diskutimi në Kongres lidhur me dialogun dhe njohjen reciproke, por pa ofruar dëshmi konkrete publike. Mospërputhja e deklarimeve ka shtuar dyshimet për ekzistencën reale të një dokumenti zyrtar apo iniciative të strukturuar amerikane për këtë fazë të procesit.
