Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisionarja për Zgjerim e Bashkimit Evropian, Marta Kos, ka vendosur ta shtyjë vizitën e saj të planifikuar në Kosovë për shkak të zhvillimeve të fundit politike në vend. Sipas Komisionit Evropian, gjatë një bisede telefonike me kryeministrin Albin Kurti, komisionarja e informoi atë se udhëtimi i saj do të shtyhet deri në një moment më të përshtatshëm. Nga Komisioni Evropian është bërë e ditur se Kos synon të udhëtojë në Prishtinë “në momentin e parë të mundshëm”. Vizita e saj pritej të realizohej më 12 mars dhe do të ishte vizita e parë në Kosovë në cilësinë e komisionares për Zgjerim. Shtyrja e kësaj vizite vjen në një moment të tensionuar politik, pasi Gjykata Kushtetuese e Kosovës ka vendosur masë të përkohshme ndaj dekretit të presidentes Vjosa Osmani për shpërndarjen e Kuvendit, pas dështimit për zgjedhjen e presidentit të ri deri më 5 mars. Vendimi i Gjykatës, i marrë pas ankesës së Vetëvendosje, parashikon që masa e përkohshme të mbetet në fuqi deri më 31 mars. Deri atëherë, as presidentja nuk mund të shpallë datën e zgjedhjeve dhe as Kuvendi nuk mund të vazhdojë seancat. Zyrtarët evropianë kanë shprehur tashmë keqardhje për situatën politike në Kosovë, duke theksuar rëndësinë e stabilitetit institucional dhe funksionimit të rregullt të institucioneve demokratike.
