Ahmet Qeriqi: Në malet e Berishës e të Llapushnikut vijnë mijëra të zhvendosur nga fshatrat rreth Kozmaqit (E mërkurë 14 prill, 1999)

Ahmet Qeriqi: Në malet e Berishës e të Llapushnikut vijnë mijëra të zhvendosur nga fshatrat rreth Kozmaqit (E mërkurë 14 prill, 1999)

Jemi zgjuar herët, si zakonisht. Po thuajse nuk kemi fjetur fare nga fluksi i ardhjes së të zhvendosurve. Një pjesë prej tyre është futur nëpër shtëpitë e braktisura, në plevica dhe afër gjerdhve. Edhe pse nëpër terr dhe mot të lig ata mundohen të gjejnë një strehë kudo qoftë për ta kaluar natën. Janë të lodhur dhe të sfilitur nga uria. Gratë të fëmijët nuk dinë se ku i kanë. E dinë vetëm se kanë mbetur në gryka të maleve dhe atje ka depërtuar ushtria dhe policia gjakatare

-Jemi në dorë të zotit! thotë njëri. Ndërsa tjetri ia kthen,

-Jemi ë dorë të dreqit dhe jo të Zotit! por nuk kemi çka të bëjmë.

-Pa thanë zoti as shkau nuk mund të na merr shpirtin! shpreh ngushëllim një tjetër.

Pa vonuar largohemi nga podrumi. Oborri dhe shtëpia e Rizës janë mbushur me të zhvendosur.

Fillimisht jemi vendosur te vendi ku po rregullohet tenda.

Kemi dëgjuar lajme nga DV, Zëri i Amerikës, BBC.

Nuk kemi sa duhet informacione nga terrenet e luftimeve në Shalë, në Llap dhe në Gallap. Edhe nga Zona Operative e Neredimes na mungojnë informatat.

Nusreti dhe Martini sekëlldisen. Ata shprehin gatishmëri për të shkuar dhe për ta rrëmbyer me dhunë telefonin satelitor. Unë dhe Neziri mendojmë se me një veprim të tillë mund të prishim punë,  sepse ata mezi presin ta lënë punë, me pretekst të kësaj dhe të ikin për në Shqipëri, mezi  presin për ta ndërprerë punën dhe për të na lënë fajin. Pikërisht për këtë nuk na japin telefonin satlitor.

Si duket të dy binden se duhet provuar edhe në forma të tjera. I kam propozuar Matrinit që të intervenojë te Rexhep Selimi. Ai është i vetmi që me autoritetin e vendosmërinë e tij mund të bëjë diçka në këtë drejtim.

Edhe sot forcat ushtarake dhe policore serbe kanë granatuar në drejtim të Berishës. Si duket ata e kanë hetuar koncentrimin e popullatës së zhvendosur e cila ka mbetur në Rrafshnaltë dhe nuk di nga të orientohet.

Me disa raketa tokë[-tokë, serbët kanë granatuar Berishën. Shpërthime të fuqishme të raketave janë dëgjuar edhe në drejtim të Fshatit të Ri. Edhe atje rreth shkollës dhe te Zabeli vazhdimisht ka koncentrim të popullatës së zhvendosur. Si duket njerëzia janë lodhur dhe nga tmerret e përjetuar nuk i japim më fare rëndësi goditjes nga distanca, të cilën e konsiderojnë si rrufenë prej qiellit, ra ku ra!

Emisionin e kemi transmetuar me kohë, edhe pse me mungesë të theksuar të informacioneve nga terreni.

Sot definitivisht jemi vendosur në tendë, në zabel te Kodra e Baliqit, Këtu është një shtrojerë e cila vështirë goditet edhe nëse identifikohet nga armiku. Po këtu kemi ndërmend që sa më parë ta rregullojmë një bunker, për masë sigurie gjatë bombardimeve.

Afër tendës e kam vendosur  edhe shatorin të cilin ma ka dhënë Besim Gashi. Aty i kam vendosur edhe rrobat dhe pajisjet e mia.

Në tendë kemi sjellë edhe gjashtë krevatët portativ  lëvizës të metalit, të cilët janë mjaft të përshtatshëm për të fjetur meqë nuk ka droje nga lagështira.

Kontrolloni gjithashtu

Nga burime të ndryshme të lajmeve bëhet e ditur se sulmet e NATO-s kanë vazhduar me intensitet gjatë 24 orëve të kaluara. Ata kanë goditur shumë caqe ushtarake dhe strategjike të armikut. Zëdhënësi i NATO-s, Xhejmi Shia ka publikuar një shifër të fluturimeve dhe të goditjeve mesatare që aeroplanët e NATO-s ndërmarrin gjatë 24 orëve. Sipas këtyre burimeve bëhet e ditur se mesatarisht për 24 orë realizohen 648 fluturime ndërsa prej tyre godasin në caqe të caktuara 245. Janë shifra tejet impozante, edhe pse ne kemi mundësi t`i përcjellim vetëm dhjetëra prej këtyre goditjeve. Sot papritmas ka ardhur, komandanti i Zonës Operative të Drenicës, Sami Lushtaku me dy ushtarë të tij. Nuk jemi parë prej nëntorit të vitit të kaluar. Samiu edhe pse është i ri dhe tërë energji, megjithatë duket i lodhur nga lufta, por edhe i nevrikosur tejmase. Pas një qëndrimi të shkurtër në tendë kemi dalë në zabel për të biseduar lidhur me problemet me të cilat po ballafaqohet sidomos Sylë Qeriqi dhe Elez Durmishi. Samiu më rrëfen se dje ka biseduar gjerë e gjatë me Sylë Qeriqin dhe Elez Durmishin. Ai më tregon se i ka ndërmarrë të gjitha masat dhe ka kërkuar nga Shefi i Shtabit, Agim Çeku që Brigada 121 të ndahet nga Zona e Pashtrikut dhe të inkuadrohet në Zonën Operative të Drenicës. Vetëm në këtë mënyrë mendon ai, mund të shafitet presioni që po bëhet kundër Sylës dhe Elezit. Meqë Samiu nuk mund të qëndrojë në këto anë, nuk mund as të ushtrojë ndonjë ndikim. Samiu më shpjegon se ka biseduar me Sylejman Selimin dhe me të tjerët, të cilët do t`i kenë parasysh disa veprime të pamatura që kanë shkaktuar huti dhe përçarje të pariparueshme. Ndahemi me Samiun me shpresë se tani e tutje mund të marrin frymë më lirisht. Rreth orës 16.oo jam nisur në drejtim të Krojmirit. Në Divjakë kam takuar Naim Imerin dhe Vehbi Zeqirin të cilët po ktheheshin me një traktor me rimorkio në drejtim të Grykës së Shalës. Më ftojnë që të hip në rimorkio, por meqë rruga është tërë gropa, më mirë udhëtoj këmbë, si gjithnjë. Në mbrëmje kam arritur në kompleksi e të zhvendosurve në fushën e Lezhës. Atje tanimë nuk ka vend as edhe për kalim këmbë. Edhe rrugët janë kufizuar. Dendësia e popullatës është e papërshkrueshme. Si duket në Lezhë kanë depërtuar edhe banorët e Ngucatit, të Bllacës, të Banjes, Lladrovcit e të Bellanicës. Kanë ardhur këtu të gjithë ata që nuk kanë dashur ta lëshojnë vendin dhe të ikin në Shqipëri. Dhe, mirë kanë bërë. Përndryshe as lufta nuk do të kishte kuptim. Popullata që është vendosur këtu ka ujë të mjaftueshëm dhe natyrë të pastër malore. Dy komponente të domosdoshme për jetë. Në Grykën e Krojmirit depërtojnë edhe qindra matrapazë dhe tregtarë. Ata, çmimet e artikujve të tyre i shesin pesë dhe dhjetëfish më shtrenjtë, por ka mjaft të tillë që i blejnë. Një pako cigare shitet 20 marka gjermane. Një kilogram qaj 30 marka. Pesë kilogramë sheqer 20 marka. Mielli nuk ka çmim të lartë, sepse këtë nuk e lejojnë komandantët e luftës. Të gjithë këta artikuj tregtarët i tërheqin nga Shtimja, Lipjani, Ferizaj e qendra të tjera. Depërtimi i mallit bëhet natën nëpër korridorin të cilin e ruajnë ushtarët tanë në relacion Pjetërshticë, Zborc, Godanc. Edhe pse luftë, edhe pse ndodhemi buzë shfarosjes tregtia dhe matrapazllëku nuk ndalen. Edhe këto të liga po i provon mbi kurriz ky popull fatmjerë. Në mbrëmje më lajmërojnë se gjatë luftimeve në vendin e quajtur, Gurinat në Blinajë, ka rënë dëshmor, Halil Nezir Metaj, nga Lagja Metaj e Krojmirit, njëri ndër luftëtarët e radhëve të para. Luftime janë zhvilluar deri në terr, meqë ushtarët tanë kanë bërë përpjekje për ta marrë trupin e dëshmorit. Burimet serbe bëjnë të ditur se aeroplanët e NATO-s kanë goditur Burgun e Dubravës, ku si duket kanë pësuar qindra të burgosur shqiptarë. Nuk kemi të dhëna se a kanë goditur forcat e NATO-s, apo serbët kanë kryer ndonjë masakër të çmeritur Si do qoftë duket sikur shumë shqiptarë kanë pësuar fatalisht. Në tendën e familjes sime në Krojmir i kam takuar të gjithë. Zymrytja më bën me dije se nëna ka ardhur ka ardhur nga Shtimja dhe ndodhet te Hasani. Labja dhe Rrezja kanë depërtuar në fshat për ta mjelë lopën. Atje zakonisht po rri gjatë ditës edhe xha Mehdiu dhe tezja Ajshe. Lëvizjet bëhen nën breshërinë e granatave të armikut, të cilët kanë depërtuar në shumë pika të Blinajës. Në mbrëmje ka ardhur për të biseduar Selatin Rizani djali i Ramadanit, profesor i edukatës fizike, tani epror i UÇK-së në pikën e maleve të Caralevës…

Ahmet Qeriqi: Gjatë 24 orëve, aeroplanët e NATO-s mesatarisht bëjnë 640 fluturime ndërsa nga këto, 245 goditje në caqet serbe. Në Berishë vjen Sami Lushtaku. (E shtunë 22 maj, 1999)

Nga burime të ndryshme të lajmeve  bëhet e ditur se sulmet e NATO-s kanë vazhduar …