Dy ditë para shpalljes së aktgjykimit në rastin për pengim të administrimit të drejtësisë në Hagë, Organizata e Veteranëve të Luftës së UÇK-së dhe platforma “Liria ka Emër” kanë shprehur mosbesim ndaj Gjykatës Speciale, duke paralajmëruar se mund të ketë organizime protestuese, varësisht nga vendimi që do të shpallet. Hashim Thaçi, Bashkim Smakaj, Isni Kilaj, Fadil Fazliu dhe Hajredin Kuçi pritet të mësojnë të martën, më 17 nëntor, vendimin e trupit gjykues në procesin ku përballen me akuza për vepra penale kundër administrimit të drejtësisë. Kryetari i Organizatës së Veteranëve të Luftës së UÇK-së, Hysni Gucati, në një prononcim për KosovaPress, ka deklaruar se besimi i kësaj organizate në Gjykatën Speciale është dëmtuar rëndë, sidomos pas aktgjykimit të 16 shtatorit ndaj katër ish-krerëve të UÇK-së, me të cilin Hashim Thaçi, Kadri Veseli, Jakup Krasniqi dhe Rexhep Selimi u dënuan në shkallë të parë. Gucati ka thënë se nuk pret një vendim që do të përmbushë pritjet për drejtësi, por ka shprehur shpresën që gjykata të ndryshojë qasjen në këtë proces dhe të marrë vendim lirues për të akuzuarit. Ai ka kritikuar atë që e konsideron njëanshmëri të Gjykatës Speciale dhe ka shprehur pakënaqësi për mënyrën se si janë trajtuar të drejtat e të akuzuarve dhe të burgosurve. Sa i përket reagimit të mundshëm pas shpalljes së aktgjykimit, kreu i OVL-UÇK-së nuk e ka përjashtuar organizimin e protestave, por ka bërë të ditur se vendimi për hapat e ardhshëm do të merret pas konsultimeve me Këshillin Drejtues të organizatës. Ndërkaq, përfaqësuesi i platformës “Liria ka Emër”, Ismail Tasholli, e ka cilësuar paradoksal faktin që pas dënimit prej 25 vjetësh ndaj Thaçit në procesin e parë, ai po përballet me një tjetër aktgjykim në një rast që lidhet me administrimin e drejtësisë. Tasholli ka shprehur bindjen se edhe procesi i dytë nuk do të prodhojë drejtësi, ndërsa ka paralajmëruar se platforma do t’i shqyrtojë mundësitë për organizime të reja. Ai ka theksuar se protestat paqësore janë një formë e domosdoshme e shprehjes së pakënaqësisë në një shoqëri demokratike, duke lënë të hapur mundësinë e mobilizimit qytetar pas vendimit. Aktgjykimi për pesë të akuzuarit pritet të shpallet më 17 nëntor 2026, në orën 10:00, në Dhomat e Specializuara të Kosovës në Hagë. Sipas aktakuzës së Zyrës së Prokurorit të Specializuar, të akuzuarit dyshohet se kanë kryer vepra penale kundër administrimit të drejtësisë, të lidhura me ndërhyrje të pretenduara në dëshmitë e dëshmitarëve të Prokurorisë. Të gjithë janë deklaruar të pafajshëm për akuzat ndaj tyre.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
