Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Demokratike të Kosovës, Memli Krasniqi, ka konfirmuar se ka pranuar ftesën nga kreu i Lëvizjes Vetëvendosje, Albin Kurti, për një takim konsultativ në prag të vazhdimit të seancës konstituive të Kuvendit të Kosovës. Takimi synon të zhbllokojë procesin e konstituimit të Kuvendit dhe të ndihmojë në përshpejtimin e krijimit të institucioneve të reja. Përmes një deklarate publike, Krasniqi tha se është përgjigjur pozitivisht ftesës, duke vënë në pah se çështja e vetme që do të diskutohet është gjetja e një kandidati të pranueshëm për postin e kryetarit të Kuvendit – një hap kyç drejt rikthimit të funksionimit të rregullt institucional dhe respektimit të afateve kushtetuese për formimin e Qeverisë. Kam pranuar një letër nga Kryetari i koalicionit Vetëvendosje-Guxo-Alternativa, z. Albin Kurti, me ftesë për një takim para vazhdimit të seancës konstituive të Kuvendit. Do t’i përgjigjem pozitivisht kësaj ftese për takim,” deklaroi Krasniqi. Ai theksoi se çështja e nënkryetarëve të Kuvendit nuk do të jetë pjesë e diskutimeve, pasi ajo është një e drejtë kushtetuese e garantuar dhe e përcaktuar qartë.
