Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Situata e papritur e përhapjes së një sëmundje të rrezikshme, sikur është aktualisht koronavisuri, ka bërë që shumica e medieve dhe gazetarëve tanë të papërvojë e të papërgjegjshëm, të përhapin panik dhe të mbesin të pa ndëshkuar si në asnjë vend tjetër të botës, sepse gazetarët shqiptarë janë më të privilegjuarit e botës, meqë jetojnë në dy Shtete ku ligjin e shkelin, ata që duhet ta mbrojnë. Ata madje luajnë edhe rolin e prokurorëve, hetuesve, gjyqtarëve manipulantëve dhe dezinformuesve më të rrezikshëm, më të pa cipë dhe më të papërgjegjshëm, vetëm për të postuar sa më parë një sensacion që iu sjellë klikime në internet. Këtë garë marrëzie ata e quajnë të arritur.
Shumë prej këtij soji të shkruesve nuk janë gazetarë, nuk e njohin andaj edhe nuk e përfillin kodin e gazetarisë, por janë mashtrues e shpifës ordinerë, të cilët paguhen nga drejtuesit e medieve për aq sa sjellin klikime dhe sensacione.
Në një gjendje të tillë ku ndodhet gazetaria shqiptare sot, shto kësaj edhe numrin enorme të medieve dhe konkurrencës së egër kapitaliste, pretendimet për të mbijetuar kanë ngjallur një garë marramendëse, nga e cila pëson në radhë të parë lexuesi i painformuar, të paarsimuarit, njerëzit pa punë e pa perspektivë që kanë prirje për të përfolur dhe për të komentuar gjithçka, janë njerëzit, që sikur thoshte Samiu i Madh, Atij që beson shumë mos i trego përralla, sepse i merr për të vërteta. Asgjë në mos ditshin më shumë këtë fjalë të urtë të Sami Frashrit e dinë të gjithë gazetarët tanë dhe shumica dërrmuese e tyre e menaxhojnë për mrekulli.
Në mediet shqiptare, sa i përket epidemisë së përhapjes së koronavirusit, afishohen kryesisht informata selektive, të mbushura me sensacione, që krijojnë pasiguri dhe ngjallin frikë. Afishohen e transmetohen lajme nga vendet e prekura me koronavirus, por jo lidhur me vendet ku nuk ka fare shfaqen të sëmundjes, apo ka fare pak sikur është rasti i Rusisë, njërit prej shteteve më të mëdha dhe më të forta të botës, ku janë evidentuar vetëm pak më shumë se 200 të prekur. Nuk kërkohet të mësohet pse ndodh kjo. Ja për shembull si e komenton këtë lajm vetë kryetari i Rusisë, Vladimir Putin. Ai tha këtë javë se vendi i tij ia kishte dalë mbanë të ndalonte përhapjen masive të koronavirusit dhe se situate ishte nën kontroll, falë masave të hershme dhe agresive që ishin marrë. Sipas informatave të publikuara nga qeveria ruse, duket se strategjia e Putin ka funksionuar dhe numri i rasteve me koronavirus është shumë i ulët duke pasur parasysh afërsinë me Kinën dhe numrin e popullsisë, bën të ditur CNN. Arsyet për triumfin e Rusisë duket se janë masat e marra në kohë, si mbyllja e kufirit 4000 km me Kinën që në 30 janar dhe krijimi i zonave të karantinës. Testimet janë një tjetër pikë e fortë e Rusisë. “OBSH tha testoni, deklaroi Melita Vujnoviq, përfaqësuesja e OBSH për Rusinë. “Epo, Rusia e filloi këtë që në fund të janarit.” Rusia nuk ngurroi të vendoste kontrolle të rrepta në aeroporte, duke u fokusuar te udhëtarët që vinin nga Italia dhe Irani.
Ky lajm nuk iu bën përshtypje gazetarëve tanë gjysmakë, sepse Rusinë e konsiderojnë shtet armik. Pastaj është edhe një dukuri tjetër, krejtësisht naive dhe e papërgjegjshme lidhur me Korenë e Veriut, një vend komunist të cilin e urrejnë shumica e gazetarëve që shkruajnë e flasin shqip. Ata shfaqin dyshime se në Kore e Veriut është bërë batërdi, se është shteti më i varfër i botës dhe ata si komunistë, janë kriminelë i fshehin të dhënat.
Edhe pse kryetari i Koresë së Veriut, Kim Jong-un, ka deklaruar zyrtarisht se me një karantinë 30-ditore, kufij të mbyllur dhe pezullim të tregtisë me Kinën, ka arritur ta mbajë vendin e tij të pastër nga koronavirusi, disa medie në Kosovë dhe në Shqipëri, pa u mbështetur në burimet zyrtare spekulojnë se sipas tyre, “vendi më i varfër i botës ka shumë të vdekur por vetëm po maskohet dhe mburrjet aspak realiste”. Liderët në qytetin më të madh Fenian, të Koresë së Veriut, thonë se vendi kishte qenë në gjendje të ndalonte infektimin nga koronavirusi duke luftuar për mbijetese kombëtare. Zyrtarët në Korenë e Veriut thanë se ata nuk gjetën asnjë të infektuar me koronavirus ndërmjet më shumë se 5400 njerëzve që u nxorën nga karantina.
Gazetarët kujdestarë të kronikave të zeza, afishojnë lajme selektive sipas shijes së tyre, apo të redaktorëve. Ata anashkalojnë lajmet pozitive, afirmative, lajmet që ngjallin besim, perspektivë, duke e ilustruar me informata nga shtete të ndryshme të botës, që nuk janë prekur na ky virus. Lajme të tilla vështirë se gjeni në shtypin e zi e të verdhë shqipfolës e shqipshkrues.
Do të gjeni lajmin e pakonfirmuar se kancelarja gjemane, Angela Merkel është prekur nga mjeku me virus, me qëllim për të ngjallur panik, me një lajm sensacional i cili shumohet e shumëzohet me “copy past” dhe për pak minuta e gjen te të gjitha ato që i quajnë dhe vetëquhen medie, portale, gazeta dhe që janë fatkeqësia dhe mungesa e informimit të drejtë të vërtetë, objektiv e konstruktiv.
Do të gjeni lajmin se deri tani në Shqipëri kanë vdekur pesë të infektuar, edhe pse janë vetëm katër dhe që të gjithë me sëmundje të rënda si kancer në mushkëri, pneumoni e sëmundje të tjera.
Në krejt mediet e shkruara e elektronike në gjuhën shqipe nuk gjeni asnjë lajm për vendet, të cilat kanë marrë masa ekstreme shtrënguese si Rusia, Turqia, Koreja, Azerbejxhani, Kazakistani i dhjetëra shtete të mëdha të botës, ku masat preventive kanë dhënë rezultate optimale.
Në vend se të mbështetet e të përshëndetet kryeministri Edi Rama në masat që ka ndërmarrë dhe po ndërmerr, ai shahet, fyhet, përçmohet, bëhet objekt talljeje e humori në emisione të medieve të ndryshme që nuk shprehin seriozitet as përgjegjësi.
Në Kosovë, mbetet në shënjestër, të sulmeve të medieve të Vetëvendosjes, kryetari Hashim Thaçi vetëm sepse ka propozuar aksidentalisht shpalljen e gjendjes së Jashtëzakonshme, e cila u bë mollë sherri për prishjen e koalicioni me paterica, i cili po mbahet në këmbë “falë” frikës nga koronavirusi.
Koha Ditore bombardon me lajme për protestat e kusia e tepsia, me çelësa e gërvallje nga ballkonet, duke kërkuar të mos rrëzohet Qeveria, sepse është një shans për Veton Surroin i cili 30 vjet më parë me kusia e tenxhere kishte bërë përpjekje ta ruante Jugosllavinë e babait të tij ambasador duke e UJD-isur Jugosllavinë e cila kishte marrë tatëpjetën për theqafje.
Edhe tani me protesta nëpër ballkone shtëpish e ndërtesash, në disa lagje të Prishtinës po u shprehka vullneti popullor për Qeverinë, e cila po e shkarkon vetveten sepse nuk ka kapacitete qeverisëse, nuk ka maturi politike, nuk ka sjellje shoqërore e serioze për t u përballur me krejt sfidat plus Koronavirusin dhe ardhmërinë krejt të zymtë.
Gazetarët e ndërgjegjshëm dhe të përgjegjshëm, e kanë të vështirë të bëjnë shumë për ta pasqyruar të vërtetën me maturi e seriozitet, sepse niveli i publiku lexues të portaleve e sensacioneve, mjerisht është më i madh në numër, ashtu sikur shumë i madh në numër është niveli i nxënësve tanë të pa pajisur me dije dhe të cilët kryejnë shkollat, por për tërë jetën mbesin gjysmë analfabetë.
