Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Kosovës, Albin Kurti, ka vazhduar të insistojë që posti i Presidentit t’i takojë Lëvizjes Vetëvendosje, duke përmendur tashmë vetëm emrin e Glauk Konjufces si kandidat të mundshëm. Kurti ka akuzuar partitë opozitare për mungesë gatishmërie për marrëveshje, duke theksuar se ka bërë oferta konkrete si për Lidhja Demokratike e Kosovës ashtu edhe për Partia Demokratike e Kosovës, por pa rezultat. “Pas aktgjykimit u takova me LDK-në, ndërsa PDK-ja refuzoi. Kam bërë oferta për bashkëqeverisje dhe rrokada institucionale, por nuk po shoh interes për marrëveshje, dhe kjo është një dëm i madh për shtetin”, deklaroi Kurti. Ndaj këtyre akuzave ka reaguar shefi i GP të PDK-së, Arian Tahiri, i cili i ka hedhur poshtë pretendimet e kryeministrit. Sipas tij, PDK-ja nuk ka refuzuar asnjë takim, por përkundrazi, nuk ka pranuar ftesa formale për vazhdimin e negociatave. Ai ka theksuar se komunikimet jozyrtare nuk mund të zëvendësojnë procesin institucional. “PDK-ja nuk ka refuzuar asnjë takim. Nuk kemi marrë asnjë ftesë zyrtare. Kemi marrë pjesë në çdo takim ku jemi ftuar dhe kemi pritur për javë të tëra në raundin e dytë, pa asnjë përgjigje. Mesazhet në WhatsApp me kërkesa për pazare ishin, thënë butë, qesharake”, u shpreh Tahiri. Ai shtoi se PDK tashmë e konsideron të përmbyllur kontributin e saj në këtë proces, pas vendimit të Këshillit Drejtues.
