Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot në orën 14.00 në amfiteatrin e Bibliotekës Kombëtare, “Pjetër Bogdani” në Prishtinë, janë përuruar, libri publicistik dokumentar: “Feniks në Kalvar”, dhe përmbledhja poetike, “Atdheu e poeti”, të shkrimtarit, poetit dhe publicistit, Martin Çuni.
Në fjalën e tij para të pranishmëve në përurim, drejtori i Radios, Kosova e Lirë Ahmet Qeriqi ka thënë se Libri “Feniks në Kalvar”, është një pasuri tjetër dokumentare artistike e luftës të Ushtrisë Çlirimtare të Kosovës, që po del në dritë, për së dyti, 20 vjet pas mbarimit të luftës. Me botimin e këtij libri vazhdon të pasurohet fondi artistik e dokumentar i publicistikës së luftës të UÇK-së, pavarësisht se librat e kësaj tematike e përmbajtje, nuk financohen nga institucionet e Kosovës. Aktiviteti gjatë luftës i Martin Çunit ka qenë i gjithanshëm dhe vështirë i krahasueshëm me ndonjë tjetër nga dimensioni i angazhimit dhe aktivitetit në shërbim të pandërprerë, ditë as natë, në luftën e UÇK-së. Dëshmi për të gjitha këto dhe shumë të tjera, të cilat nuk përmenden dot me një fjalë rasti, sikur është kjo kur po e përurojmë librin e tij të radhës, “Feniks në Kalvar” është vetë Martini, jemi të gjithë bashkëluftëtarët e tij, janë qindra ushtarë, eprorë e pjesëtarë të popullatës së zhvendosur, është arkivi i botuar i Radios në 3 vëllime, janë librat e tij të botuara pas luftës, janë rreth 1000 foto autentike të kohës së luftës, të cilat i ka filmuar me aparatin e tij fotografik në zonat e luftës, është diktafoni i tij gjatë luftës, i cili ka regjistruar qindra biseda me luftëtarë e eprorë.
Në fjalën e tij lidhur me përmbledhjen poetike “Atdheu e poeti” të Martin Çunit, ka folur edhe veprimtari e shkrimtari, Rrahim Sadiku, i cili ka shkoqitur disa veçanti të poezisë së Martin Çunit në përgjithësi, veçmas në përmbledhjen e fundit poetike, Atdheu dhe poeti. Ai ka vlerësuar opusin krijues të autorit, i cili ka botuar disa përmbledhje poetike, në të cilat ka pasqyruar me realizëm realitetin objektiv të Kosovës para gjatë dhe pas luftës.
Për librat e Martin Çunit kanë folur dhe Rizah Graiçevci dhe Fadil Curri, ndërsa kanë lexuar poezi; Kaona Gashi dhe Bjeshka Agron Çuni.
Në fund të përurimit, autori, i dy librave: Martin Çuni foli për disa aktivitete të tij poetike në Gjermani dhe i përshëndeti të pranishmit, që morën pjesë në përurimin e librave: Feniks në Kalvar dhe Atdheu e poeti.
