Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mbrëmë në Malishevë, është mbajtur nata e parë e festivalit folklorik “Oda e Llapushës”-edicioni i tetë, festival që tashmë është tradicional. Në këtë festival po marrin pjesë ansamble, shoqëri, grupe dhe këngëtar të shumtë, nga të gjitha trevat shqiptare, duke prezantuar vlerat e folklorit tonë të pasur, përmes këngëve, valleve e lojërave tradicionale shqiptare.
Festivali është hapur nga i pari i Komunës së Malishevës, Ekrem Kastrati, nën përkujdesjen e të cilit edhe mbahet ky festival, ndër festivalet më të mëdha në trojet shqiptare.
Në fjalën e hapjes së festivalit, kryetari i Komunës së Malishevës, Ekrem Kastrati, tha se “kjo padyshim është ngjarja më e madhe kulturore në komunën tonë dhe është festival, që gërsheton historinë dhe artin e folklorit burimor shqiptar, të kultivuar brez pas brezi në odat tona. Oda simbolizon mikpritjen, që është virtyti më i larët shqiptar, e në veçanti në trevën e Llapushës. Malisheva është vendlindja e rapsodëve më të shquar që ka pasur kombi ynë, të cilët me artin e tyre i kanë kaluar edhe kufijtë, duke na përfaqësuar denjësisht në gara ndërkombëtare, madje duke marrë vendet e para në nivel të Evropës”, tha mes tjerash në fjalën e hapjes, i pari i Malishevës, Ekrem Kastrati. Ai më pas, tha se “ky festival, po i bën bashkë dhe i mirëpret artistët dhe grupet më të mira nga të gjitha trojet shqiptare, Kosova, Shqipëria, Maqedonia, Mali i Zi, Medvegja dhe Diaspora” dhe i ka uruar të gjithë pjesëmarrësit dhe jurinë profesionale, e cila do të vlerësoj artistët që marrin pjesë në festival.
Festivali “Oda e Llapushës”, mbahet në kuadër të shënimit të ditëve të diasporës, ndërsa këtij aktiviteti i paraprinë, panairi me veshje dhe ushqime tradicionale dhe parakalimi i grupeve dhe artistëve nëpër rrugët e qytetit të Malishevës.
Sonte, mbahet nata e dytë dhe shpallen fituesit sipas kategorive të përcaktuara, kurse çmimi kryesor i festivalit është çmimi “Salih e Feriz Krasniqi”.
