Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Lidhja Demokratike e Kosovës, Lumir Abdixhiku, ka ndarë momente nga tubimi i hapjes së fushatës elektorale, duke e cilësuar këtë proces si më shumë se një garë politike, por si një mision për të ardhmen e Kosovës. Përmes një mesazhi drejtuar qytetarëve, Abdixhiku tha se rrugëtimi i nisur nga LDK-ja synon ta përmbyllë ëndrrën dhe sakrificën e brezave që kontribuuan për lirinë dhe shtetndërtimin e Kosovës. “Ky nuk është vetëm rrugëtim politik. Është mision për ta përmbyllur atë që brezat më herët e nisën me sakrificë”, deklaroi Abdixhiku. Ai theksoi se vizioni i tij dhe i LDK-së është ndërtimi i një shteti të fortë dhe të respektuar ndërkombëtarisht, ku qytetarët jetojnë me dinjitet dhe siguri për të ardhmen. “Misioni për ta bërë Kosovën jo vetëm shtet të pavarur – por shtet të fortë. Jo vetëm shtet të njohur – por shtet të respektuar. Jo vetëm vend ku mbijetohet – por vend ku jetohet me dinjitet”, u shpreh ai. Hapja e fushatës së LDK-së u shoqërua me pjesëmarrje të madhe të simpatizantëve dhe strukturave të partisë, ndërsa Abdixhiku kërkoi mbështetje qytetare për vizionin që, sipas tij, synon zhvillim, dinjitet dhe rikthim të shpresës për Kosovën.
