Komandanti i KFOR-it, Erhard Byhler, zhvilloi një takim  me kryetarin e Kuvendit, Jakup Krasniqi me ç’rast ai është zotuar se gjatë mandatit të tij prioritet  do të jetë thellimi i bashkëpunimit me Forcën e Sigurisë së Kosovës.  Sa i përket veriut të Kosovës, kam parasysh disa bisedime që do të dëshirojë t’i fillojë së shpejti atje, mirëpo jam i bindur, se të gjitha veprimet tona, do të jenë në koordinim të plotë ndërmjet KFOR-it, institucioneve të Kosovës dhe bashkësisë ndërkombëtare. Ndërkohë  kryetari  i Kuvendit, jakup Krasniqi e përgëzoi gjeneralin Byhler  për marrjen e detyrës së re dhe e falënderoi  për punën që ka bërë KFOR-i në Kosovë.

Kryetari, Fatmir Sejdiu, ka pritur sot në takim shefin e Ushtrisë Shqiptare, gjeneralin, Maksim Malaj. Ai e falënderoi z. Malaj për përkrahjen që po jep Ushtria Shqiptare për ngritjen dhe profesionalizimin e Forcës së Sigurisë së Kosovës. Gjatë bisdedave të zhvilluara ata vlerësuan se bashkëpunimi i ndërsjellë i vendeve të rajonit për paqe dhe stabilitet ndikon drejtpërdrejt në përshpejtimin e integrimit të kësaj pjese të Evropës Juglindore në strukturat euroatlantike.

Një delegacion i nivelit më të lart të vendit do të niset në fund të kësaj jave për Nju Jork. Gjatë qëndrimit në Nju Jork, autoritetet e larta të vendit do të angazhohen për shtimin e njohjeve të Kosovës. Kryetari, Fatmir Sejdiu, kryeministri, Hashim Thaçi dhe ministri, Skender Hyseni, do të bëjnë përpjekje për të bindur përfaqësuesit e vendeve të ndryshme në Organizatën e Kombeve të Bashkuara që t’i bindin vendet e tyre për të marr vendim për njohjen e Kosovës. Gjatë qëndrimit në Nju Jork, autoritetet tona do të angazhohen edhe për të bindur përfaqësuesit e vendeve të ndryshme që të mos votojnë për rezolutën serbe e cila bënë thirrje për nisjen e negociatave të reja në mes të Prishtinës dhe Beogradit zyrtar.

Njoftohet se në Bruksel janë duke u zhvilluar bisedime në mes të zyrtarëve të Bashkimit Evropian dhe Qeverisë së Serbisë. Bisedat janë përqendruar në ndryshimin e qëndrimeve të Beogradit zyrtar ndaj mendimit të GJND-së dhe në veçanti bisedave me Prishtinën. Zyrtarë të Bashkimit Evropian janë cituar të kenë thënë se zgjidhja më e mirë do të ishte tërheqja e plotë e rezolutës serbe, por kanë shfaqur shpresën për arritjen e një kompromisi me Beogradin për rezolutën deri në prag të mbledhjes së Asamblesë së Përgjithshme të OKB-së. Bisedimet intensive në Bruksel janë ndërmjetësuar nga Spanja, e cila është një nga pesë vendet anëtare të BE-së, që ende nuk e kanë njohur pavarësinë e Kosovës.

Ambasadori i Britanisë së Madhe në vendin tone, Endi Sparks, ka deklaruar se rezoluta e Serbisë nuk përkon me mendimin e GJND-së, por ajo paraqet një kthim mbrapa në përpjekje për  të mbajtur të hapur një çështje që në e konsiderojmë të mbyllur, meqë  Kosova është shtet i pavarur dhe sovran dhe ka integritetin territorial të pacenueshëm. Ne i kemi kërkuar Serbisë që të tërheqë këtë rezolutë dhe të vijmë te një tekst i cili do të ishte neutral dhe i cili do të hapte rrugën për atë që ne duam, pra bisedime konstruktive mes Serbisë dhe Kosovës, si shtete fqinje të pavarura, për shumë çështje, të cilat do të ishin në interes të përbashkët.

Në ceremoninë e ndërrimit të komandës së KFOR-it,  Fatmir Sejdiu ka deklaruar se njëmbëdhjetë vjet pas hyrjes së NATO-s në Kosovë, vendi ynë është transformuar rrënjësisht. Në pranverën e vitit 1999, NATO-ja ndërhyri për ta shpëtuar popullin e Kosovës nga zhbërja fizike. E ritheksojmë se kjo ishte një ndërhyrje e pashembullt humanitare, e papërsëritshme në madhështinë e saj. NATO-ja nuk ndërhyri në Kosovë për qëllime thjesht ushtarake, ajo ndërhyri për shpëtimin e një populli, për mbrojtjen e një qytetërimi, i cili rrezikohej të zhbëhej. Sejdiu ka shtuar se sot Kosova është faktor i rëndësishëm i paqes dhe i stabilitetit në rajon, me vizion të qartë për të qenë sa më parë anëtare e Bashkimit Evropian, e NATO-s dhe e institucioneve të tjera ndërkombëtare, duke përfshirë edhe OKB-në.